மோட்டார் சுந்தரம் பிள்ளை (Motor Sundaram Pillai)


சில நாட்களுக்கு முன்னால் இந்த ப்ரோகிராமில் பார்த்த படம். சாரதா/ப்ளம் ஆகியோரின் சில கடிதங்களால் நினைவு வந்தது.

1966இல் வந்த படம். ஜெமினி தயாரிப்பு. இயக்குனர் ஆனந்தவிகடன் ஆசிரியரான பாலசுப்ரமணியம் என்று நினைக்கிறேன். டைட்டில்களில் “பாலு” என்று போட்டிருந்தார்கள். அவர் இயக்கிய முதல் படமாம். சிவாஜியைத் தவிர, சௌகார் ஜானகி, மணிமாலா, முத்தையா(விவரத்துக்கு நன்றி, சாரதா), ஜெயலலிதா, காஞ்சனா, சிவகுமார், ரவிச்சந்திரன், நாகேஷ், எஸ். ராமாராவ், மேஜர் சுந்தரராஜன், நாகையா, சச்சு என்று ஒரு நட்சத்திரப் பட்டாளமே நடித்திருக்கிறது. இசை எம்எஸ்வி. நன்றாக ஓடியிருக்கும் என்று நினைக்கிறேன். நிச்சயமாக தெரியவில்லை.

நவராத்திரியில் சிவாஜிக்கு ஒரு டாக்டர் வேஷம் உண்டு. அந்த நடிப்பை இங்கே மீண்டும் உபயோகப்படுத்தி இருக்கிறார். ஒரு சாந்தமான, அன்பான (பெரிய) குடும்பத் தலைவன். 9 குழந்தைகள். கதையின் ஆரம்பத்தில் சௌகார் மீண்டும் கர்ப்பம் வேறு. பெரிய பணக்காரர். பட்டணத்தில் ஃபாக்டரி. ஒரு சிறு நகரத்தில் (காலேஜ் எல்லாம் இருக்கிறது) குடும்பம். வார இறுதியில் மட்டும் வீட்டுக்கு வருவார். அவரது வரவை எதிர்பார்த்திருக்கும் பிள்ளைகள். கொஞ்சம் அசடான அக்கா பையன் தான் வீட்டின் ஆண் பிள்ளை. திருமணமாகி இன்னும் கணவன் வீட்டுக்கு போகாத முதல் பெண் காஞ்சனா. காலேஜில் படிக்கும் இரண்டு பெண்கள், அதில் ஒன்று ஜெ. (ஜெ வேறு எந்தப் படத்திலாவது சிவாஜிக்கு மகளாக நடித்திருக்கிறாரா?) அவர்கள் இருவருக்கும் காதல். ஜெ காதலிப்பது லோகல் காலேஜ் ப்ரின்சிபல் மகன் ரவிச்சந்திரனை. இரண்டாவது பெண் ஸ்டேஷன் மாஸ்டர் பையனான காலேஜ் ப்ரொஃபஸரை காதலிக்கிறாள். காதலுக்கு பச்சை கொடி காட்டும் குடும்பங்கள். நிச்சயதார்த்தத்தின்போது சிவாஜிக்கு இன்னொரு மனைவியும் குடும்பமும் இருப்பது தெரியவருகிறது. ஊர் பெரிய மனிதனுக்கு இருக்கும் ஒழுக்க குறைவால் ஷாக்காகும் எல்லாரும் நிச்சயதார்த்தத்தை நிறுத்திவிட, சௌகார் கிடைத்தது சான்ஸ் என்று அழ ஆரம்பிக்க, கடைசியில் சிவாஜி சௌகாரின் தங்கை மணிமாலாவைத்தான் சௌகார் இறந்துவிட்டார் என்று நினத்து கல்யாணம் பண்ணிக்கொண்டது தெரிகிறது. இரண்டு குடும்பங்களும் ஒன்று சேர்ந்து, நின்று போன கல்யாணங்கள் நடக்க, சுபம்!

பாட்டுக்கள் சூப்பர். எனக்கு மிகவும் பிடித்த பாட்டு “மனமே முருகனின் மயில்வாகனம்”தான். பாடியது ராதா ஜெயலக்ஷ்மி. எழுதியது பத்மஸ்ரீ கொத்தமங்கலம் சுப்பு. கொத்தமங்கலம் சுப்பு ஜெமினி பிக்சர்ஸை தூக்கிப் பிடித்த ஒரு தூண். அவர் பத்மஸ்ரீ விருது பெற்றவர் என்பதை இப்போதுதான் தெரிந்துகொண்டேன். 4 வரிகள்தான், எல்லா வரிகளையும் தருகிறேன்.
மனமே முருகனின் மயில் வாகனம் – என்
மாந்தளிர் மேனி குகனாலயம்
குரலே செந்தூரின் கோவில் மணி – அதில்
குகனே ஷண்முகனே என்றொலி கூவு நீ

சில சினிமா பாட்டுக்கள் பொதுவாக புழங்கும் பக்தி பாடல்களை விட என் மனதை தொடுகின்றன. ‘மனம் கனிந்தருள் வேல்முருகா”, “சுந்தரி சௌந்தரி நிரந்தரியே”, “ஸ்ரீரங்க ரங்க நாதனின் பாதம்”, “முருகா முருகா முருகா வருவாய் மயில் மீதினிலே”, “மாசறு பொன்னே வருக”, இந்த பாட்டுகளுக்கும் “கற்பனை என்றாலும் கற்சிலை என்றாலும்”, “கற்பகவல்லி நின் பொற்பதங்கள் துதித்தேன்”, “ஓம் சக்தி ஓம் சக்தி ஓம்” போன்ற பாட்டுகளுக்கும் என் மனதில் வித்தியாசம் தெரியவில்லை. உண்மையை சொல்லப் போனால் “டகுடகு டிகுடிகு டங்கு டிங்குகு” போன்ற வரிகள் வரும் கந்த சஷ்டி கவசத்தை விட இவற்றையே நான் விரும்புகிறேன். (இப்படி எழுதியதற்காக என் அம்மா என்னை மன்னிக்கப் போவதில்லை. ஆனால் அம்மா, காலையில் கந்த சஷ்டி கவசம் சொன்ன பிறகுதான் காப்பி என்று நீ சொன்ன நாட்களையும் நான் மறக்கவில்லை. :-))

“குபுகுபு நான் எஞ்சின்” ஒரு துள்ளலான பாட்டு. ஏ.எல். ராகவனின் கலக்கலான குரல் நாகேஷுக்கு (ஜெமினிக்கும்) நன்றாக பொருந்துகிறது. எல்.ஆர். ஈஸ்வரி இணைந்து பாடியது. “எதிரில் வந்தது பொண்ணு” என்றும் ஒரு ஏ.எல். ராகவன் பாட்டு உண்டு.

“காத்திருந்த கண்களே” பி.பி. ஸ்ரீனிவாசும், சுசீலாவும் பாடிய இனிமையான பாட்டு. எழுதியது கண்ணதாசன். ரவிசந்திரனும், ஜெயும் சாத்தனூர் அணைக்கட்டில் பாடுவார்கள். இந்த அணைக்கட்டு இன்னும் அழகாகத்தான் இருக்கிறதா? தெரிந்தவர்கள் எழுதுங்களேன்!

“துள்ளி துள்ளி விளையாட துடிக்குது மனசு” சுசீலா, எல்.ஆர். ஈஸ்வரி, சூலமங்கலம் ராஜலக்ஷ்மி இணைந்து பாடும் ஒரு நல்ல பாட்டு.

இதைத் தவிர “காதல் என்றால் என்ன” என்றும் ஒரு பாட்டு உண்டு.

பல பாடல்களை இங்கே கேட்கலாம்.

சிவகுமார் இப்போதும் இளமையானவர்தான். ஆனால் இதிலே உண்மையிலேயே காலேஜில் படிக்கும் பையன் போல இருந்தார். பார்த்ததும் நானும் என் மனைவியும் சிரித்துவிட்டோம்!

சிவாஜி இதிலே மிகவும் அடக்கி வாசித்திருப்பார். கடைசி காட்சியில் தான் மணிமாலாவை கல்யாணம் செய்து கொண்ட காட்சியிலேதான் கொஞ்சம் நடித்துப் பார்ப்பார். தான் 25 வருஷங்களாக பட்ட நரக வேதனையை விவரிக்கும் வசனத்தில்தான் நான் சிரித்துவிட்டேன். அந்த 25 வருஷங்களில் சௌகாருக்கு ஒன்பதோ பத்தோ குழந்தைகள், மணிமாலாவுக்கு நாலோ ஐந்தோ. ஆனால் இவருக்கு நரக வேதனையாம். இவரது சொர்க்கம் எப்படி இருந்திருக்குமோ?

நாகேஷின் நகைச்சுவை பகுதி துப்பறியும் சாம்புவிலிருந்து inspire ஆனது. சாம்புவைப் போலவே இவரும் ஏதாவது செய்யப் போய் திருடர்கள் அகப்பட்டுக்கொள்வார்கள். சிரிக்கும்படி இருந்தது.

நல்ல குடுமப்ப் படம். அருமையான பாட்டுக்கள். நல்ல நகைச்சுவை. சிவாஜியின் மிருதுவான நடிப்பு. எனக்கு மிகவும் பிடித்திருந்தது.

அடுத்த வாரப் படங்கள் (Week of Sep 1)


திங்கள் – பணம் படைத்தவன். எம்ஜிஆரின் சுமாரான படங்களில் ஒன்று. ஒல்லியான கே.ஆர். விஜயா, சௌகார் நடித்தது. “கண் போன போக்கிலே”, “பவளக்கொடியிலே முத்துக்கள் பூத்தால்”, “அந்த மாப்பிளே கையை புடிச்சான்”, “எனக்கொரு மகன் பிறப்பான்”, “மாணிக்கத் தொட்டில் அங்கிருக்க” போன்ற பல நல்ல பாட்டுக்கள். படம் ஒன்றும் சுகமில்லை என்று நினைவு.

செவ்வாய் – நாலும் தெரிந்தவன். கேள்விப்பட்டதே இல்லை. சன் டிவிக்கு படங்கள் எங்கிருந்துதான் கிடைக்குமோ தெரியவில்லை. ரவிச்சந்திரன், காஞ்சனா நடித்ததாம். எஸ்.எம். சுப்பையா நாயுடு இசையாம்.

புதன் – பிள்ளையார் சதுர்த்தியினால் இந்த ப்ரோகிராம் கட். விஷால், பிரபு, நதியா நடித்த புத்தம் புதிய திரைப்படமான தாமிரபரணி திரையிடப்படுகிறது.

புதன் வியாழன் – அன்பே ஆருயிரே. எஸ்.ஜே. சூர்யா படம் இல்லை! சிவாஜி, பெரிய சோடா புட்டி கண்ணாடி போட்ட மஞ்சுளா நடித்தது. தோல்வி படம். “மல்லிகை முல்லை பூப்பந்தல்” பாட்டுதான் தெரியும்.

வியாழன் வெள்ளி- மகாதேவி. “மணந்தால் மகாதேவி இல்லையேல் மரண தேவி” பி.எஸ். வீரப்பாவின் பிரபலமான வசனம் கேட்டிருக்கலாம். “கண் மூடும் வேளையிலும் கலை என்ன கலையே”, “குறுக்கு வழியில் வாழ்வு தேடிடும் குருட்டு உலகமடா” என்ற நல்ல பாட்டுக்கள். கண்ணதாசன் கதை வசனம்!

இந்த முறை 4 படங்கள்தான் அறிவிக்கப்பட்டன. (பிள்ளையார் சதுர்த்தியினால் என்று தெரிந்துகொண்டேன்.) திரையிடப்படும் படங்கள் வேறு மோசமாகிகொண்டே போகின்றன. இத்தோடு ப்ரோகிராமை முடிக்கப் போகிறார்களோ என்னவோ தெரியவில்லை. I hope not.

தசாவதாரம் (Dasavatharam)


Hello Partnerஇலிருந்து எல்லாம் இன்ப மயத்திற்கு போய் அங்கிருந்து தசாவதாரத்துக்கு வந்துவிட்டேன். Hello Partner ஜுரம் முடிவதற்குள் நவராத்திரி படத்துக்கும் விமரிசனம் எழுதினாலும் எழுதுவேன், you have been warned.

நாங்கள் வசிக்கும் சான் ஃப்ரான்சிஸ்கோ பகுதியில் இந்தியப் படங்களை திரையிடுவதற்கென்றே சில தியேட்டர்கள் உண்டு. தியேட்டர்கள் – naz, காமெரா3 – கொஞ்சம் மட்டமாகத்தான் இருக்கும். நடுவில் இன்டர்நெட் boom ஆனபோது ஒரு நல்ல தியேட்டர் complex இருந்தது, boom முடிந்ததும் அவர்களால் சமாளிக்க முடியாமல் இந்த மட்டரக தியேட்டருக்கு போய்விட்டார்கள். ஆனால் சமீப காலமாக நல்ல தியேட்டர்களில் ஏஎம்சி, செஞ்சுரி போன்ற தியேட்டர்களில் பல பெரிய படங்கள் – சிவாஜி, தாரே ஜமீன் பர் போன்றவை – திரையிடப்படுகின்றன. எனக்கு தெரிந்து முதல் முறையாக ஃப்ரீமாண்ட் சினிடோமில் திரைஇடப்பட்டது தசாவதாரம்தான் என்று நினைக்கிறேன். நாங்கள் முதல் நாள் நைட் ஷோ போனோம். டிக்கெட் விலை சாதாரணமாக 10 டாலர். இதற்கோ 16 டாலர். தியேட்டர் houseful. இங்கே எல்லாம் சீட் நம்பர் கிடையாது. எங்கள் குடும்பம் கொஞ்சம் பெரியது – 8 டிக்கெட். ஒரே வரிசையில் சீட் கிடைக்க கொஞ்சம் ததிங்கிணத்தோம் போட்டோம். முதல் வரிசையில் கூட மக்கள் உட்கார்ந்து படம் பார்த்தார்கள். இவ்வளவு பேர் சாதாரணமாக வரமாட்டர்கள். ஏசி சரியாக ஓடாமல் ஒரே புழுக்கம் வேறு. ஆனால் எல்லாரும் இடைவேளை வரை பொறுத்திருந்து பிறகுதான் போய் தியேட்டர்காரர்களிடம் சண்டை போட்டோம். யாருக்கும் ஒரு நிமிஷம் கூட படததை மிஸ் பண்ண மனசில்லை.

ஒரு படத்தின் நோக்கம் என்ன? எம்ஜிஆர், விஜய், ரஜினி படங்களின் நோக்கம் ரசிகர்கள் மீண்டும் மீண்டும் பார்க்கவேண்டும், நன்றாக ஓடவேண்டும் என்பதுதான். சிவாஜிக்கு தன் நடிப்புத் திறனை வெளிப்படுத்தும் வாய்ப்புக்கள் நிறைய இருக்கவேண்டும். கமலுக்கோ படட்தின் ரிசல்டை விட தான் பெருமுயற்சி எடுத்திருக்கவேண்டும் என்பதுதான் முக்கியமாக இருக்கிறது. அந்த முயற்சியால் ஏதாவது உபயோகம் உண்டா இல்லையா என்ற கேள்வி அவருக்கு இரண்டாம் பட்சமாக இருக்கிறது.

தசாவதாரத்தில் நல்ல பொழுதுபோக்கு படத்திற்கான கூறுகள் எல்லாம் இருக்கின்றன. விறுவிறுப்பான கதை, பிரமிக்க வைக்கும் காட்சிகள், படத்தோடு ஒட்டி இழைந்து வரும் பல்ராம் நாயுடு நகைச்சுவை, கவர்ச்சிகரமான மல்லிகா ஷெராவத், மெயின் கதையோடு அவ்வளவு சம்பந்தம் இல்லாவிட்டாலும் அசத்தும் ரங்கராஜ நம்பி காட்சிகள், நடிப்புத் திறனை வெளிப்படுத்தும் பூவராகன் காட்சிகள், வியக்க வைக்கும் கிருஷ்ணவேணி பாட்டி, பூவராகன் மேக்கப், சிரிக்க வைக்கும் ஜார்ஜ் புஷ், “கல்லை மட்டும் கண்டால்” பாட்டும் அது படமாக்கப்பட்டிருக்கும் விதமும், தாளம் போட வைக்கும் “ஓகோ சனம்” பாட்டு இவற்றை எல்லாம் 2.7 படங்களுக்கு பயன்படுத்தலாம்.

படத்தின் பலவீனம் கமலின் ஈகோதான். எம்.ஆர். ராதா ஒரு முறை சிவாஜியிடம் சொன்னாராம் – “படத்தோட முதலிலே நீ வரணும். நடுவே அப்பப்ப வரணும். கடைசியில் ஸ்ட்ராங்கா வரணும். படம் பூராவும் நீயே வரயே?” என்று. கமலின் ப்ராப்ளமும் அதுதான். விட்டால் நானே அசின் ரோலும் பண்ணுகிறேன் என்று கிளம்பிவிடுவார். (மல்லிகா ஷெராவத் ரோல் என்றால் அவருக்கு லட்டு சாப்பிடுவது போல இருக்கும் – 70களின் ஆடைக் குறைப்பு மன்னர்)

எதற்காக 10 ரோல்கள்? கதாநாயகனாக வந்தார், சரி. (அதை கூட வேறு யாராவது ஒரு இளம் கதாநாயகருக்காவது கொடுத்திருக்கலாம்). பல்ராம் நாயுடு ரோல் எடுத்துக்கொண்டார், பர்ஃபெக்ட். 10 நிமிஷம் வந்தாலும் நம்பி ரோல் படத்தின் உச்சக்கட்டம், அதையும் செய்தார், சரி. மிச்ச எல்லாம் எதற்கு? இவர் மேக்கப்புக்கு செய்த செலவுக்கு யாராவது நல்ல நடிகர்களைப் போட்டிருக்கலாம்.

சரி, தான் கறுப்பாகவும் வரமுடியும் என்று நிரூபிக்க பூவராகன் ரோலும், பாட்டி வேஷம் போட ஆசைப்பட்டதால் கிருஷ்ணவேணிப் பாட்டி ரோலும், சும்மா ஒரு ஜாலிக்காக ஜார்ஜ் புஷ் ரோலும், “ஓகோ சனம்” பாட்டு பாட அவ்தார் சிங் ரோலும் செய்தார் என்று ஒத்துக்கொள்ளலாம். அந்த வெள்ளைக்கார வில்லன் ரோலையாவது விட்டுக்கொடுத்திருக்ககூடாதா? கதைக்கு அந்த ஜப்பானிய ஷிங்கென் பாத்திரம் தேவையே இல்லையே! அந்த கலிஃபுல்லா ரோல் எதற்கு? ஏன் இப்படி சோதிக்கிறார்?

உண்மையில் தசாவதாரத்துக்கு உண்மையான முன்னோடி அஜித்தின் சிடிசன் தான். அதிலும் அஜித்துக்கு வெவ்வேறு கெட்டப்புகளில் வருவதுதான் முக்கியமாக இருந்தது. அது பொருந்துகிறதா இல்லையா என்பது இரண்டாம் பட்சம். பெரிய முகமூடிகளை அணிந்து வருவது போல் இருக்கும். இதிலும் அப்படித்தான். பல்ராம் நாயுடு, ஃப்ளெட்சர், ஷிங்கென், பாட்டி, பூவராகன், கலிஃபுல்லா, ஜார்ஜ் புஷ் எல்லாரும் ஒரு மாஸ்க் அனிந்து வருவது போல்தான் இருக்கிறது. அந்த மாஸ்க்கையும் மீறி, தனது டயலாக் டெலிவரி, பாடி லாங்வேஜ் போன்றவற்றால் அவர் நாயுடு, பாட்டி ரோல்களை நன்றாக செய்திருக்கிறார். பூவராகன் ரோலில் டயலாகாலும், உடலாலுமே அற்புதமாக நடித்து பூவராகனின் பாத்திரத்தை நாம் சந்தேகம் இல்லாமல் உணர்ந்துகொள்ள செய்திருக்கிறார். ஆனால் படத்தை விட கமல்தான் தெரிகிறார். கலைஞன் என்ற முறையில் இது அவருக்கு தோல்விதான்.

கவனியுங்கள், இது கமலின் தோல்வி. கே.எஸ். ரவிகுமாரின் தோல்வி அல்ல. ஏனென்றால் இது கமல் படம், வேறு யாரின் படமும் அல்ல.

சுருக்கமான கதை – விஞ்ஞானி கமல் ஒரு ஆபத்தான வைரஸை வில்லன்களிடமிருந்து காப்பாற்றி இந்தியாவுக்கு அனுப்பிவிடுகிறார். வில்லன்கள் அவருக்கு தீவிரவாதி பட்டம் கட்டி அவரை துரத்துகிறார்கள். சிஐஏ ஏஜன்ட் ஃப்ளெட்சரும் கவர்ச்சிக் கன்னி மல்லிகா ஷெராவத்தும் வில்லன்களுக்காக அவரை துரத்திக்கொண்டு இந்தியா வருகிறார்கள். தீவிரவாதி என்று நினைத்து லோகல் அதிகாரி பல்ராம் நாயுடுவும் அவரை துரத்துகிறார். வைரஸ் ஒரு பெருமாள் விக்ரகத்தில் மாட்டிக்கொள்கிறது. அதை தூக்கிக்கொண்டு கமலும், அவர் பின்னால் அசினும், அவர்கள் பின்னால் நாயுடுவும், ஃப்ளெட்சரும் ஓடுகிறார்கள். வழியில் தலித் தலைவர் பூவராகன், கிருஷ்ணவேணிப் பாட்டி, 7 அடி உயர கலிஃபுல்லா, பழி வாங்க வரும் ஜப்பானிய ஷிங்கென், பாடகர் அவ்தார் சிங்,  குறுக்கிடுகிறார்கள். கடைசியில் சுனாமி வந்து தமிழகத்தில் பலர் இறந்தாலும், அந்த வைரஸையும் அழித்துவிடுகிறது. கடைசியில் ஜார்ஜ் புஷ் ஷும் க்ராஃபிக்ஸில் முதல்வர் கலைஞர் கருணாநிதியும் பிரதமர் மன்மோகன் சிங்கும் பாராட்ட, ஒரு விதமான சுபம்! படத்தின் முதலிலும் கடைசியிலும் நம்பியும், நம்பி காப்பாற்ற நினைத்த கோவிந்தராஜப் பெருமாள் சிலையும் காட்டப்படுகிறது. கடலில் போடப்பட்ட சிலை பூமித்தட்டுகளை கொஞ்சம் நகர்த்தி 2004இல் சுனாமி வந்தது இந்த வைரஸை அழித்து மனித குலத்தை காப்பாற்றத்தானோ என்ற கேள்வியுடன் படம் முடிகிறது.

கோவிந்தராஜப் பெருமாள் சிலையை கடலில் மூழ்கடித்த சோழ அரசன் கதை வைஷ்ணவ குரு பரம்பரை கதைகளில் சொல்லப்படுகிறது. இது இரண்டாம் குலோத்துங்க சோழன் என்று நம்பப்படுகிறது. இந்த அரசன் ராமானுஜரையும் அவரது சிஷ்யர்களையும் கொடுமைப்படுத்தினான் என்று இந்த குரு பரம்பரை கதைகளில் சொல்லப்படுகிறது. (கூரத்தாழ்வாரை குருடாக்கி, ராமானுஜரை நாட்டை விட்டே துரத்தினான்). சிதம்பரத்தில் இன்றும் இருக்கும் கோவிந்தராஜப் பெருமாள் சன்னதியில் இருந்த ஒரிஜினல் சிலை இவ்வாறு கடலில் வீசப்பட்டது என்று இந்த கதைகளில் சொல்லப்படுகிறது. வைஷ்ணவ குரு பரம்பரை கதைகளைத் தவிர வேறு ஆதாரங்கள் இல்லை என்று சொல்வார்கள்.

நம்பி பகுதிக்கு 100க்கு 100 மார்க் கொடுக்கலாம். அருமையாக படமாக்கப்பட்டிருக்கிறது. நம்பியின் உடம்பை துளைக்கும் காட்சிகள் நடுங்க வைத்தன. உலகத் தரம் வாய்ந்த க்ராஃபிக்ஸ் காட்சிகள்.

படத்தின் முக்கிய கதை சுவாரசியமாக இருந்தது. ராமசாமி (நாயக்கர்) ரோலுக்கு 100க்கு 75 மார்க் கொடுக்கலாம். “கடவுள் இருந்தால் நன்றாக இருக்கும்” வசனம் நன்றாக இருந்தது. அசின்தான் கொஞ்சம் கொடுமை.

ஃப்ளெட்சர் மேக்கப் பொருந்தவே இல்லை. படத்தின் இறுதியில்தான் மேக்கப்பை மீறி அவரது ரோலை பார்க்க முடிந்தது. யாராவது ஒரு அமெரிக்க நடிகரையே போட்டிருக்கலாம். 100க்கு 35 மார்க்.

ஜார்ஜ் புஷ் சும்மா தமாஷுக்கு சேர்க்கப்பட்ட ரோல். அவரை கொஞ்சம் முட்டாளாக சித்தரித்தது நல்ல ஐடியா. அதனால் பொருந்தாத மேக்கப் உறுத்தவில்லை. ஆனால் இந்த படத்தை வெள்ளை மாளிகைக்கு அனுப்பி பார்க்க சொன்னார்களாம். கொஞ்சம் ஓவராக இல்லை? 100க்கு 45 மார்க்.

ஜப்பானிய மேக்கப் பொருந்தவே இல்லை. utter waste. 100க்கு 0 மார்க்.

பாடகர் ரோல் எதற்காக? தேவையே இல்லை. அதுவும் குண்டு பாய்ந்ததால் அவருக்கு கான்சர் குணமாவது ரொம்ப ஓவர். “ஓகோ சனம்” பாட்டுக்காக 50 மார்க். அப்புறம் எனக்கு 25 வருஷங்களுக்கு முன் ஜெயப்ரதாவை ரொம்ப பிடிக்கும். கமலுக்கும் அப்படியே இருக்க்லாம். அதற்காக இன்னும் அவரையே போடவேண்டுமா? சிம்ரன், நயனதாரா யாரும் கிடைக்கவில்லையா?

பல்ராம் நாயுடு கலக்கிவிட்டார். கொஞ்சம் நிறுத்தி நிதானமாக பேசியதும், அவரது பாடி லாங்வேஜும் நன்றாக இருந்தன. 100க்கு 120 மார்க்.

பாட்டியை க்ளோஸப்பில் பார்த்தால் சின்ன குழந்தைகள் பயந்துவிடலாம். ஆனால் நன்றாக நடித்திருந்தார். 100க்கு 65 மார்க்.

பூவராகன் நடிப்பு அபாரம். 100க்கு 90 மார்க்.

கலிஃபுல்லா ரோல் ஒரு வேஸ்ட். 100க்கு மைனஸ் 20 மார்க்.

Himesh ரேஷமைய்யா இசை. இரண்டு பாட்டுக்கள் நினைவிருக்கின்றன. “கல்லை மட்டும் கண்டால்” சூப்பர் மெட்டு என்று சொல்லமாட்டேன். ஆனால் வரிகள் நன்றாக இருந்தன. காட்சிகள் அபாரம். “ஓகோ சனம்” நல்ல பாட்டு.

2008இல் வந்த படம். கமல், அசின், நெப்போலியன், மல்லிகா ஷெராவத், எம்.எஸ். பாஸ்கர், கே.ஆர். விஜயா, நாகேஷ், சந்தான பாரதி, பி. வாசு, சிட்டிபாபு, கவிஞர் கபிலன் நடித்திருக்கிறார்கள். கே.எஸ். ரவிகுமார் இயக்கம். Himesh ரேஷமைய்யா இசை.

இந்த படம் கலை ரீதியாக ஒரு தோல்விதான். சில சமயங்களில் தோல்விகளும் பார்க்கக்கூடியவையே. குறைகள் இருந்தாலும், கமலின் 10 வேஷ obsession உறுத்தினாலும், பாருங்கள்! This is a grand failure! I give it a B.

இமயம் (Imayam)


1979இல் வெளி வந்த படம். சிவாஜி, ஸ்ரீவித்யா, ஜெய்கணேஷ், தேங்காய் ஸ்ரீனிவாசன், மீரா,  மனோரமா, ஒய்.ஜி. மகேந்திரன் நடித்திருக்கிறார்கள். முக்தா ஸ்ரீனிவாசன் இயக்கம். எம்எஸ்வி இசை. சிவாஜியின் மைத்துனியாக வருபவர் மீரா((நன்றி, மது!). ஜெய்கணேஷின் முதல் காதலியாக வருபவர் ரீனா. யாரென்று தெரியவில்லை(சாரதாவுக்கு நன்றி!).

சிவாஜி படங்களைப் பற்றி விவரங்கள் அறிய நடிகர்திலகம்.காம் என்ற தளத்தைப் பார்க்கலாம். பல விவரங்கள் இங்கே கிடைக்கின்றன. ரிலீஸ் ஆன தேதி, உடன் நடித்த நடிகர்கள், இயக்குனர், தொழில் நுட்ப கலைஞர்கள், இசை அமைப்பாளர் விவரங்கள் அவர் நடித்த எல்லா படங்களுக்கும் கிடைக்கின்றன. சில படங்களுக்கு முழுமையான விமர்சனமும் இருக்கிறது. இந்த படத்துக்கு இல்லை, நாந்தான் கதி.

இமயம் திரிசூலத்துக்கு அப்புறம் வந்த படம். சிவாஜி charisma அப்போதுதான் exponetialஆக குறைய ஆரம்பித்தது. இந்த படத்தை பார்க்கவேண்டும் என்று அப்போது தோன்றவில்லை. இது பெரிய அளவில் வெற்றி பெறவும் இல்லை. நேற்றுதான் முதல் முறையாக பார்த்தேன்.

எதிர்பார்த்த அளவு மோசம் இல்லை. முக்தா ஸ்ரீனிவாசன் படங்களில் கதை என்று ஒன்று இருக்கத்தான் செய்கிறது. அது கடி கதையாக, cliched ஆக இருக்கலாம், ஆனால் கதையே இல்லாமல் heroக்களை மட்டும் நம்பி அவர் படம் எடுப்பதில்லை.

படத்தின் பெரிய பலம் அது நேபாளத்தில் எடுக்கப்பட்டதுதான். மிகவும் அழகான வெளிப்புறக் காட்சிகள். பனியால் முழுமையாக மூடப்பட்ட மலைகளும், கோவில் படிகளின் இரண்டு புறமும் இருக்கும் பிரம்மாண்டமான சிலைகளும், பரந்த ஆறுகளும் இங்கே போயே ஆகவேண்டும் என்று ஆவலை ஏற்படுத்தின. எல்லா படங்களுக்கும் வெளிப்புறக் காட்சிகள் எங்கே எடுக்கப்பட்டன என்று பதிவு செய்யப்பட்டால் நமக்கு எவ்வளவோ உதவியாக இருக்கும்.

பாட்டுக்களும் அருமையாக இருந்தன. அந்தக் காலத்தில் கேட்கப்பட்டன என்றாலும், உரிய வெற்றியை அடையவில்லை என்றுதான் நினைக்கிறேன். “கங்கை யமுனை” பாட்டின் இனிமைக்கு இன்னும் பெரிய வெற்றி அடைந்திருக்கவேண்டும். இளையராஜா அலையில் இதெல்லாம் கொஞ்சம் முழுகிவிட்டதோ என்னவோ! (60களில் எம்எஸ்வி இசையில் சில வி. குமார் பாட்டுக்கள் முழுகியதைப் போல)

“கங்கை யமுனை”தான் படத்தின் மாஸ்டர்பீஸ். ஜேசுதாசும் வாணி ஜெயராமும் கலக்கிவிட்டார்கள். அழகான ஸ்ரீவித்யா. ஒரு மங்களமான இசையை கேட்பதுபோல் இருக்கிறது. ஒரு இடத்தில் பின்னால் ஒரு கணவாயில் ரிப்பன் போல இரண்டு ஆறுகள் ஓடுவது பார்க்க பார்க்க திகட்டவில்லை. (வீடியோவில் 3 நிமிஷத்துக்கு பிறகு வருகிறது.) ரீவைண்ட் பட்டன் எங்கே என்று தேடினேன், அப்புறம்தான் இது வீடியோ இல்லை என்று நினைவு வந்தது.

“இமயம் கண்டேன்” நல்ல பாட்டு. நேபாளக் காட்சிகள் மிகவும் நன்றாக இருந்தன. ஒரே ஒரு குறைதான் – ஜெய்கணேஷும், மீராவும் இல்லாமல் இருந்தால் இன்னும் பிரமாதமாக இருந்திருக்கும். அவர்களது சில அசைவுகள் கவர்ச்சியாகவோ ஆபாசமாகவோ இல்லை, கோரமாக இருந்தன.

“கண்ணிலே குடியிருந்து” இன்னொரு நல்ல பாட்டு. டிஎம்எஸ்ஸின் குரல் நல்ல கம்பீரமாக வந்து விழுகிறது. அதுவும் அவர் “தனனன தனக்கதன்னன்” என்று பாடுவது நம்மையும் தாளம் போடவைக்கிறது. பின்னால் வரும் கோவிலும் (படிகளும், பிரமாண்ட சிலைகளும்) அருமை.

“சக்தி என்னடா உன் புத்தி என்னடா” சுமாரான ஒரு பாட்டு. டிஎம்எஸ்ஸும் எஸ்பிபியும் பாடியிருக்கிறார்கள்.

கதை சிக்கல் ஒன்றும் பெரியதில்லை. சிவாஜியும் தேங்காயும் பார்ட்னர்கள். தேங்காயின் தம்பி ஜெய்கணேஷுக்கு கல்யாணம் ஆகாமலேயே சில தொடுப்புகளும் ஒரு தொடுப்பு மூலம் ஒரு பையனும் இருக்கிறார்கள். சிவாஜியின் மைத்துனி மீரா ஜெய்கணேஷை விரும்புகிறார். நிச்சயதார்த்ததின்போது ஜெய்கணேஷின் முதல் காதலி ரீனா தற்கொலை செய்துகொள்கிறார். சின்னப் பையன் சொல்வதை வைத்து சிவாஜி நிச்சயதார்த்தத்தை நிறுத்திவிடுகிறார். எல்லாரும் சின்னப் பையன் ஏதோ உளறுகிறான், நம்பாதீர்கள் என்று சொல்லிப் பார்க்கிறார்கள். சிவாஜி கேட்காததால் எல்லாரும் சிவாஜிக்கு எதிராக திரும்பிவிடுகிறார்கள். உண்மையை வெளிப்படுத்த சிவாஜி எடுக்கும் ஒவ்வொரு முயற்சியையும் ஜெய்கணேஷ் சூழ்ச்சி செய்து முறியடிக்கிறார். படம் முடியப் போகிறது என்று இயக்குனர் சொல்லிவிட்டதால் ஜெய்கணேஷ் மனம் திருந்தி உண்மையை ஒத்துக்கொள்ளும்போது சிவாஜி அபௌட் டர்ன் அடித்து ஜெய்கணேஷ் நல்லவர் என்றும் தான் அவர் கெட்டவர் என்று சொன்னது தவறு என்றும் சொல்கிறார். பிறகு ஜெய்கணேஷை கொல்ல வரும் துப்பாக்கி குண்டை தான் வாங்கிக்கொண்டு, சக்கர நாற்காலியில் உட்கார்ந்துகொண்டு மணமக்களை ஆசிர்வதித்து சுபம்!

படத்தில் எல்லாருக்கும் நதிகளின் பெயர்கள்தான். சிவாஜியின் பேர் கங்காதரன். தேங்காயின் பேர் வைகை அம்பலம். ஜெய்கணேஷின் பேர் கிருஷ்ணா. மீராவின் பேர் சிந்து. சின்னப் பையனின் பேர் ஜம்னா. ரீனா பேர் நர்மதா. மனோரமாவின் பேர் கோதாவரி. ஸ்ரீவித்யாவின் பேர் மறந்துவிட்டது, காவேரியோ? ரீனாவின் அண்ணன் பேர் ஹூக்ளி! நகைச்சுவை பாத்திரம் ஒய்.ஜி. மகேந்திரனின் பேர் கூவம்!

ஜெய்கணேஷ் சின்னப் பையனை சாக்லேட் மரம் இருக்கிறது என்று நம்ப வைக்கும் காட்சியில் இயக்குனர் கொஞ்சம் புத்திசாலித்தனத்தை காட்டி இருக்கிறார்.

இயக்குனர் தன் புத்திசாலித்தனத்தை காட்டும் இன்னொரு இடம். கதைக்கு தேவை இல்லாவிட்டாலும் நீச்சல் உடையில் சிஐடி சகுந்தலாவை ஜெய்கணேஷின் ஒரு தொடுப்பு என்று 10 நிமிஷம் காட்டுவது.

எல்லாருக்கும் எல்லாரும் எல்லா நேரத்திலும் எங்கே இருப்பார்கள் என்று தெரிகிறது. மனம் திருந்துவதற்காக ஜெய்கணேஷ் ஒரு பாம்புப் புற்றுக்கு அருகில் போய் யோசனை செய்துகொண்டிருப்பார். கரெக்டாக அங்கே அந்த சின்னப் பையன் வருவான். பிறகு சிவாஜியும் வந்துவிடுவார்.

சிவாஜி குண்டை தன் நெஞ்சில் வாங்கிக்கொள்வார். அடுத்த காட்சியில் சக்கர நாற்காலி! நெஞ்சில் குண்டு பாய்ந்தால் சக்கர நாற்காலி எதற்கு? ஒரு வேளை தயாரிப்பாளருக்கு இலவசமாக கிடைத்திருக்குமோ?

ஜெய்கணேஷ் சிவாஜியைப் பார்த்து பேசும் ஒரு வசனம் எனக்கு புரியவே இல்லை. “உயரத்துக்கு உதாரணமா இமயத்தை சொல்வாங்க. அந்த இமயத்துக்கே உதாரணம் நீங்க”. இமயத்துக்கு என்னய்யா உதாரணம்?

தேங்காய் சிவாஜியையே மிஞ்சும்படி நடித்திருக்கிறார். அங்கங்கே சிவாஜி “நடித்தாலும்” ரொம்ப மோசம் இல்லை.

எதிர்பார்த்ததை விட பெட்டர்.

To Infinity and beyond


சம்பந்தமே இல்லாமல் ஒரு பதிவு.

என் 4 வயதுப் பெண் க்ரியா அவ்வப்போது சூப்பர் கலக்கு கலக்குவாள். இப்போதுதான் கிண்டர்கார்டனில் சேர்ந்திருக்கிறாள். ஒரு முறை ஏதோ பெரிய எண்களைப் பற்றி பேச்சு வந்தது. அவலது 9 வயது அக்கா ஸ்ரேயா அவளுக்கு Infinity is the biggest number என்று சொல்லிக்கொடுத்திருக்கிறாள் போல. “எதுடா பெரிய நம்பர்” என்று நான் கேட்டேன். க்ரியா முதலில் Infinity என்று சொன்னாள். பிறகு கொஞ்சம் யோசித்து “One hundred” என்று சேர்த்துக் கொண்டாள். பிறகு இன்னும் ஒரு 15 வினாடிகள் யோசித்தாள். எல்லா உண்மைகளையும் புரிந்துகொண்டுவிட்ட சந்தோஷத்துடன் “Infinity, one hundred, AND thirteen! They are the biggest numbers appa” என்று சொன்னாள்!

ஒரிஜினல் தசாவதாரம் – எல்லாம் இன்ப மயம்


எனக்கு இன்னும் Hello Partner ஜுரம் போகவில்லை. Hello Partnerஇன் மறுபதிப்பான எல்லாம் இன்ப மயத்தில் கமல் 9 வேஷங்களில் வருவார். (ஞாபகத்திலிருந்து எழுதுகிறேன்) ஒரே காரக்டர்தான், ஆனால் 9 கெட் அப்கள். (சிடிசன் படத்தில் அஜித் போல) “ரார வேணூஊகோபாலா” மெட்டில் அமைந்த “மாமன் வூடு மச்சு வூடு” இந்தப் படத்தில்தான். “சொல்ல சொல்ல என்ன பெருமை” பாட்டிற்கு கமல் ஆடும் ஆட்டும் ஆட்டம் தமிழ் நாட்டுக்கு வெளியிலும் “புகழ்” பெற்றது. (notorious என்பதற்கு தமிழ் வார்த்தை கிடக்கவில்லை. :-)) digg.com உள்பட பல மேல் நாட்டு தளங்களிலும் பார்க்கப்பட்டிருக்கிறது. கமல் அந்தக் காலத்து டிஸ்கோ ஸ்டைலில் ஒரு ஆஃப்ரோ விக்குடனும், பாதி திறந்த மார்புடனும் ஆடுவார். (அப்போதெல்லாம் முடிந்த வரை கமல் ஆடைக் குறைப்பு செய்துவிடுவார்.)

ஒரு முழுமையான விமரிசனத்தை இங்கே பார்க்கலாம்.

இந்த பாட்டுக்களை தேடினேன், கிடைக்கவில்லை. “எல்லாம் இன்ப மயம்” என்று தேடினால் என்று  “சொல்ல சொல்ல என்ன பெருமை” பற்றிதான் பல பதிவுகள் கிடைக்கிறது. யாராவது சொன்னால் இங்கே லிங்க் செய்துவிடலாம்…

ஆயிரம் Hit வாங்கிய அபூர்வ சிந்தாமணி


நானே எனக்கு தெரிந்தவர்களை ஒவ்வொருவராக “அய்யா வாங்க அம்மா வாங்க” என்று கூப்பிட்டு படிக்க சொன்னாலொயொழிய யாரும் இதை படிக்கப் போவதில்லை என்று நினைத்துத்தான் இந்த ப்ளாகை ஆரம்பித்தேன். என் மனைவியிடமும், என் நண்பன் பக்ஸிடமும் “நீங்களாவது படியுங்கப்பா” என்று சொல்லியும் இருந்தேன். அவர்களைத் தவிரவும் 998 பேர் படிதத்ிருக்கிறீர்கள். நன்றி!

மிகவும் பாப்புலரான விமர்சனம் - பெரிய இடத்துப் பெண். 56 பேர் பாத்திருக்கீங்க. த திரிசூலம் விமர்சனமும் 52 பேர் பாத்திருக்கீங்க. நிஜ வாழ்க்கையின் எம்ஜிஆர் சிவாஜி போட்டி இங்கேயும் தொடருதே! சுப்ரமணியபுரத்துக்கு மூன்றாவது இடம். அதென்னவோ தெரியலே, தேன் கிண்ணத்துக்கு நிறைய பார்வைகள். தேன் கிண்ணம்னு வேற ஏதோ தேடி இங்கே வந்துட்டிங்கன்னு நினைக்கிறேன். 25% tfmpage தளத்திலிருந்து இங்கே வந்திருக்கீங்க. இன்னொரு 25% ப்ளாக் திரட்டிகளிலிர்ந்து – திரட்டி, ட்விட்டர், கனிமை, தமிழ்மணம், டமிலகம், போன்ற தளங்களிலிருந்து வந்திருக்கீங்க. எப்படி வந்திருந்தாலும், எதைப் பார்த்திருந்தாலும், நல்வரவு!

சோம்பல் பார்க்காமல் மறுமொழி சொன்னவர்களுக்கு ஒரு ஸ்பெஷல் நன்றி. நீங்கள் கொடுத்த உற்சாகம்தான் என்னை விடாமல் எழுத வைத்தது. சிவாஜி ரசிகர்களான ராஜ், ப்ளம், முக்கியமாக சாரதா, இளைஞர்களும் படிக்கிறார்கள் என்று உற்சாகப்படுத்திய வெங்கட்ரமணன், ராசா, மற்றும் bsubra, எம்.ஜி. சக்ரபாணியின் பேரனான ப்ரதீப், ஷக்திப்ரபா, சேவியர், tfmpage அன்பர்கள் app_engine, rajeshKRV, வாட்டர்லூ, எல்லாருக்கும் நன்றி. ப்ளாக் செய்வதில் இருந்த ஆரம்ப கஷ்டங்களை வெல்ல உதவி செய்த எழுத்தாளர் ஜெயமோகனுக்கும் நன்றி.

என் மனைவிக்கு ஒரு வார்த்தை – எதுவாயிருந்தாலும் நமக்குள்ள பேசி தீர்த்துக்கலாம். யாரையாவது அடிக்கணும்னா கருத்து சொன்ன இந்த கந்தசாமிகளையெல்லாம் அடி!

பாதி ராஜ்யம்


நாட்டில் அரைக் கிறுக்குகள் யாருமே இல்லையா? ஒரு கால் கிறுக்குக்கு கூடவா பஞ்சம்? ஒருத்தர் கூடவா Hello Partner பார்க்கவில்லை? யாராவது விமரிசனம் எழுதினால் ஆயிரம் பொன் – இல்லை வேண்டாம் எனது ராஜ்ஜியத்தில் பாதி ராஜ்யம் தருகிறேன். (ராஜ்யம் நல்ல வேளையாக இல்லை…)

அன்னமிட்ட கை (Annamitta Kai)


1972இல் வெளியிடப்பட்டது. எம்ஜிஆர், நம்பியார், மனோகர், ஜெயலலிதா, பாரதி, வி.கே. ராமசாமி, நாகேஷ், மனோரமா நடித்திருக்கிறார்கள். கே.வி. மகாதேவன் இசை. வாலி எல்லா பாடல்களையும் எழுதியிருக்கிறார்.

பாடல்கள் மோசம் இல்லை. ஆனால் கே.வி. மகாதேவனிடமும் எம்ஜிஆரிடமும் எதிர்பார்க்ககூடிய தரம் இல்லை என்றுதான் சொல்லவேண்டும்.

ஒரு aside. புகழேந்தி கே.வி. மகாதேவனின் நிரந்தர உதவியாளர். அவர் தனியாக சில படங்களுக்கு இசை அமைத்திருந்தாலும், கே.வி. மகாதேவனிடம் இருந்த பக்தியாலும் விஸ்வாசத்தாலும் கடைசி வரைக்கும் அவரோடேயே இருந்தார். இசைத் துறையில்தான் இந்த மாதிரி விஸ்வாசம் சாதாரணமாக காணப்படுகிறது. எம்எஸ்வி தன் குருநாதரான எஸ்.எம். சுப்பையா நாயுடுவையும் அவரது மனைவியையும் தன் வீட்டிலேயே வைத்து பராமரித்தார். இளையராஜாவுக்கு அவரது குருக்களான ஜி.கே. வெங்கடேஷிடமும் தன்ராஜ் மாஸ்டரிடமும் இருந்த பக்தி சினிமாக்காரர்களுக்கு தெரியும். நடிப்பு, இயக்கம் போன்ற துறைகளில் இது அவ்வளவாக தென்படுவதில்லையே, ஏன்?

“அன்னமிட்ட கை” எம்ஜிஆரின் தத்துவப் பாட்டுக்களில் ஒன்று. டிஎம்எஸ்ஸின் குரலில் நல்ல உற்சாகம் இருக்கும். பாட்டைக் கேட்டவுடன் வாலி எம்ஜிஆருக்காக எழுதியது என்று சொல்லிவிடலாம்.

“ஒண்ணொண்ணா ஒண்ணொண்ணா சொல்லு சொல்லு” ஒரு சுமாரான பாட்டு. டிஎம்எஸ் சுசீலா. எம்ஜிஆர் கோட்டு சூட்டு டையுடன் பாடுவார். எம்ஜிஆர் தன் டூயட்டுக்களுக்கு ஒரு ஃபார்முலா வைத்திருந்தார். செட் போட்டு எடுத்தால் ஒன்று கோட்டு சூட்டு டை. இல்லாவிட்டால் ராஜ ராணி உடை. வெளிப்புற படப்பிடிப்பு என்றால் கோட்டு சூட்டு. அப்போதுதான் ரிச்சாக இருக்கும் என்று நினைத்திருக்கிறார்.

“மயங்கிவிட்டேன் உன்னைக் கண்டு” பாரதியும் எம்ஜிஆரும் பாடும் டூயட். டிஎம்எஸ் சுசீலா. எம்ஜிஆர் தன் ரசிகர்களை கவர்வதற்காக ராஜா உடையில் வந்து பாடுவார். பாரதி ஒரு அழகான நடிகை. தமிழில் ஏன் பெரிய கதாநாயகியாக வரமுடியவில்லை என்று தெரியவில்லை. அவரது குரலில் வேற்று மாநில வாடை அடிப்பதாலோ என்னவோ?

“அழகுக்கு மறு பெயர் கண்ணா” நல்ல பாட்டு. இந்த ஒரு பாட்டு மட்டும் டிஎம்எஸ் எஸ். ஜானகி குரலில். ஜெ அப்போதெல்லாம் இன்று இருப்பது போல் குண்டாக இல்லை. அதற்காக அவருக்கு “நூலிடை” என்றெல்லாம் சொல்லக்கூடாது!

“பதினாறு வயதினிலே பதினேழு பிள்ளையம்மா” என்றும் ஒரு பாட்டு உண்டு. சுசீலா.அது வரும்போது நான் தூங்கிவிட்டேனோ என்னவோ – இந்தப் பாட்டை மிஸ் செய்துவிட்டேன்.

பாட்டுக்களை இங்கே கேட்கலாம்.

எம்ஜிஆர் நடித்த கடைசி கறுப்பு வெள்ளை படம் என்று ஞாபகம். நீண்ட நாட்களாக தயாரிப்பில் இருந்தது. சில காட்சிகள் எம்ஜிஆர் சுடப்படுவதற்கு முன் எடுக்கப்பட்டவை. அவரது குரல் மாறுபாடு தெரிகிறது. படம் அவ்வளவாக வெற்றி பெறவில்லை என்று நினைக்கிறேன். எனது நினைவுகள் சரியாக இருந்தால் இது எம்ஜிஆரின் அபூர்வமான தோல்வி படங்களில் ஒன்று. (ப்ளம் கவனிக்க) அன்னமிட்ட கை தவப் புதல்வனோடும் வசந்த மாளிகையோடும் போட்டி போட்டது என்று நினைக்கிறேன். சிவாஜியின் அந்த இரண்டு படங்களும் பெரிய hits.

கதை வழக்கம் போல் முதல் காட்சியிலேயே யூகிக்கக்கூடிய ஒன்றுதான். எம்ஜிஆரும் நம்பியாரும் மாற்றாந்தாய் மக்கள். எம்ஜிஆர் உரிமை உள்ள (இளைய) வாரிசு. அப்பாவின் தவறான பழக்கங்களால் எம்ஜிஆர் அவரை பிரிந்து தாத்தா வீட்டில் வளர்வார். நம்பியார் எங்கோ ஓடிப்போய் வளர்வார். எம்ஜிஆர் எப்படி வளர்ந்திருப்பார், நம்பியார் எப்படி வளர்ந்திருப்பார் என்று உங்களுக்கு தெரியாவிட்டால் நீங்கள் தமிழனே அல்ல. (கலைஞர் terminologyயில் “அவாள்”ஆக கூட இருக்கமுடியாது) வளர்ந்த இருவரும் தற்செயலாக சந்தித்து ஒருவரை ஒருவர் தெரிந்துகொள்வார்கள். தியாகச் சுடரான எம்ஜிஆர் தன் அண்ணனை வாரிசாக நடிக்க சொல்வார். முதலாளியாக எப்போதுமே இருக்க விரும்பும் நம்பியாருக்கு தியாகியான எம்ஜிஆரிடம் கொஞ்சம் பயம் இருக்கும். கைவிடப்பட்ட நம்பியாரின் அம்மா பண்டரிபாய் குருடி. இறந்துபோனதாக கருதப்படும் அப்பா உயிரோடுதான் காடுகளில் சுற்றிக்கொண்டிருப்பார். மனோகரின் சூழ்ச்சி, பாரதியின் ஒரு தலை காதல், நம்பியாரின் பணத்தாசை எல்லாவற்றையும் சமாளித்து ஜெயை காதலித்து எஸ்டேட் தொழிலாளர்களின் தலைவனாகி, பெரியம்மா பண்டரிபாய்க்கு மீண்டும் கண் கொடுத்து, நம்பியாரை திருத்தி அப்பப்பா! புரட்சித் தலைவரால்தான் முடியும்!

பாரதி அழகாக இருக்கிறார். “அவளுக்கென்று ஒரு மனம்” படத்திலும் நன்றாக இருப்பார். (இதுவும் இந்த ப்ரோக்ராமில் முன்னால் திரையிடப்பட்டது, ஒரு தாமதமான விமர்சனம் எழுதலாமா என்று ஒரு யோசனை.)

எம்ஜிஆரின் அப்பாவாக வருபவர் பேர் முத்தையா (சாரதா, நன்றி!)யார்? அஅவருடைய குரல் எனக்கு ரொம்ப பிடிக்கும். “மோட்டார் சுந்தரம் பிள்ளை”யிலும் சிவாஜியின் மாமனாராக வருவார். (இதுவும் இந்த ப்ரோக்ராமில் முன்னால் திரையிடப்பட்டது, ஒரு தாமதமான விமர்சனம் எழுதலாமா என்று ஒரு யோசனை.)

நகைச்சுவை பகுதி சுமாராக இருந்தது. நாகேஷும் மனோரமாவும் வி. கே. ராமசாமியும் தமிழ் சினிமா பாட்டுக்களை பாடியே காதல், காதலுக்கு அப்பாவின் எதிர்ப்பு, அப்பாவுக்கு காதலர்கள் எதிர்ப்பு எல்லாவற்றையும் சொல்லிவிடுவார்கள். தமிழில் எல்லாத்துக்கும் பாட்டு இருக்கிறது!

படத்தில் சிம்பாலிக் டயலாக் ஜாஸ்தி. உதாரணத்துக்கு ஒன்று. எம்ஜிஆர் தன்னை காதலிப்பதாக நினைக்கும் பாரதி அடுப்பங்கரையில் கன்னத்தில் கொஞ்சம் கரியோடு இருக்கும் ஜெயிடம் எம்ஜிஆர் தன்னை காதலிப்பதாக சொல்வார். அதை கேட்டவுடன் ஜெ கையில் இருக்கும் பாத்திரத்தை தவறவிட்டுவிடுவார். அப்போது டயலாக்குகள்.

பாரதி: என்னாச்சு?
ஜெ: கை தவறிடுச்சு.
பாரதி: நீ ஜாக்கிரதையா வச்சிருந்திருக்கணும்
ஜெ: ஜாக்கிரதையாகத்தான் இருந்தேன், அப்படியும் தவறிடுச்சு.
பாரதி: பரவாயில்லே, நான் எடுத்துக்கிறேன்.
ஜெ: எனக்கு அடுப்பில் வேலை இருக்கு, அப்புறம் பேசலாம்.
பாரதி: முகத்திலே கரி, துடைச்சுக்கோ!

படத்தில் வீர தீர சாகசங்கள் அதிகம் இல்லை. சுவாரசியமும் கம்மிதான். தீவிர எம்ஜிஆர் ரசிகர்கள் தவிர மற்றவர்கள் மிஸ் செய்துவிடலாம். ரொம்ப வேண்டுமென்றால் பாட்டுக்களை மட்டும் கேட்கலாம்.

சுப்ரமணியபுரம் (Subramaniapuram)


ஏதாவது ஒரு படத்துக்கு விமரிசனம் எழுதலாம் என்று தோன்றியதால் எழுதுகிறேன். ஒரு மாறுதலுக்காக புதுப் படம். சமீபத்தில் பார்த்தது. எவ்வளவு நாட்கள்தான் பழைய படங்களுக்கே விமரிசனம் எழுதுவது? இதற்கும் எழுதிப் பார்ப்போமே!

2008-இல் வந்த படம். பெரும் வெற்றி பெற்றிருக்கிறது. வர்த்தக ரீதியாக மட்டும் இல்லாமல், கலை ரீதியாகவும் எல்லாரும் நல்ல படம் என்று சொல்கிறார்கள்.

சரி என்றும் நானும் எடுத்துப் பார்த்தேன். tangentially ஒரு சந்தேகம். இங்கே கிடைப்பதெல்லாம் திருட்டு டிவிடிதானா? எப்படி கண்டுபிடிப்பது? தரத்தைப் பார்த்தால் ரகசியமாக தியேட்டரில் வீடியோ எடுத்தது போல் இல்லை. For the record, நான் வசிப்பது நூவார்க், கலிஃபோர்னியாவில். டிவிடி எடுத்துப் பார்த்தது இங்கே பிரபலாமக உள்ள coconut hill என்ற மளிகை கடையில்.

“கண்கள் இரண்டால்” என்ற பாட்டு அருமையாக இருக்கிறது. ஜேம்ஸ் வசந்தனுக்கு இதுதான் முதல் படமாம். யார் பாடியது என்று தெரியவில்லை. எனக்கு புதிய பாடகர்களின் குரல்களை அடையாளம் கண்டு பிடிக்க முடிவதில்லை.

வெங்கட்ரமணன் உதவி - பாடலைப் பாடியது, பெள்ளிராஜ், தீபா மரியம்! றேடியோஸ்பதி கானாபிரபா பதிவில் ஜேம்ஸின் நேர்முகம் (ஒலிப்பேட்டியாக) வெளியாகியிருந்தது.

எனக்கு அடையாளம் தெரிந்த நடிகர்கள் சென்னை 28 ஜெய்யும் கஞ்சா கருப்பும்தான். படத்தின் இயக்குனரான சசிகுமார் இன்னொரு கதாநாயகராம். துணை இயக்குனர் சமுத்திரக்கனி வில்லனாம். புதுமுகம் ஸ்வாதி கதாநாயகியாம்.

ஆகா ஓகோ என்றார்கள். அந்த அளவுக்கு படம் இல்லை. மோசம் என்றும் சொல்லமாட்டேன். சுமாரான படம், அவ்வளவுதான். தமிழின் தரம் ரொம்பவே மோசமாக இருக்கிறது, அதனால்தான் கொஞ்சம் பரவாயில்லாமல் ஒரு படம் வந்தால் கூட அதை ஆகாயத்துக்கு உயர்த்தி வைத்து பேசுகிறோம்.

படத்தின் பலம் நம்பக்கூடிய பாத்திரங்களும், 70களின் முடிவை தத்ரூபமாக கொண்டு வந்திருப்பதும்தான். பெல்பாட்டங்களும், கூடையை கவிழ்த்தது போல் தலைமுடியும் (அரை வழுக்கையனான எனக்கு பொறாமையாக இருந்தது.), தாவணி போட்ட பெண்களும், 70களில் பார்த்த வீடுகளும், எங்கேயாவது முடங்கிகொண்டு பீடி பிடிக்கும் இலைஞர்களும் என்னைப் போன்ற அரைக் கிழவர்கள் நிச்சயமாக பார்த்திருக்கிறோம். வன்முறை என்ற சுழலில் மெதுமெதுவாக சிக்கிக்கொள்ளும் அந்த இளைஞர்கள் நன்றாக வடிவமைக்கப் பட்டிருந்தார்கள். குடும்பத்துக்கும் காதலுக்கும் நடுவில் மாட்டிக்கொண்டு காதலனுக்கு துரோகம் செய்யும் அந்த இளைஞியும், காசுக்காக நண்பனுக்கு துரோகம் செய்யும் கஞ்சா கறுப்பும் உயிரும் சதையும் உள்ள மனிதர்கள். ஜெய் “ஒரு பொட்டச்சியிடம் உயிர் பிச்சை கேக்கரபடி ஆயிடுச்சே” என்று புலம்புவது ரியலிஸ்டிக்காக 70களின் மதிப்பீடுகளை பிரதிபலித்தது.

மிக மெதுவாக நகரும் திரைக்கதை எனது பொறுமையை சோதித்தது. நகைச்சுவை என்ற பெயரில் முதல் பாதியில் கஞ்சா கறுப்பு கொலை செய்கிறார். இரண்டாவது பகுதி வரும் வரைக்கும் கதை ஆமை வேகத்தில் நகருவது பெரிய பலவீனம். கதையில் சுவாரசியம் போதவில்லை.

என்னைப் போன்ற மேல் நாட்டு மனிதர்களுக்கு வீடியோவில் பார்ப்பது உத்தமம். இந்தியாவில் நிறைய நேரம் இருப்பவர்கள் தியேட்டருக்கு சென்று பார்க்கலாம்.

Follow

Get every new post delivered to your Inbox.

Join 215 other followers