பத்மவிபூஷன்/பத்மபூஷன்/பத்மஸ்ரீ பெற்ற சினிமா ட்ராமாக்காரர்கள்


    பத்மவிபூஷன் விருதுகள்:

இப்ராஹீம் அல்காஜி புகழ் பெற்ற நாடக இயக்குனர். தேசிய நாடகப் பள்ளியின் (நேஷனல் ஸ்கூல் ஆஃப் டிராமா) இயக்குனராக இருந்தவர். ஒரு விதத்தில் இவரும் உமையாள்புரம் சிவராமனைப் போன்றவர்தான். திறமை நிறைந்தவர், ஆனால் அவரது சின்ன வட்டத்துக்கு வெளியே அதிகம் அறியப்படாதவர். இப்படிப்பட்டவர்களை recognize செய்த இந்திய அரசுக்கு ஒரு சபாஷ்!

ஜொஹ்ரா செகல் நடனத்தில் பேர் பெற்றவர். நாடக நடிகை. ஆனால் அவரை சீனி கம் திரைப்படத்தில் அமிதாபின் அம்மாவாக நடித்தவர் என்று சொன்னால் அடையாளம் கண்டு கொள்வது சுலபமாக இருக்கும். பாஜி ஆன் தி பீச், தில் சே/உயிரே, பெண்ட் இட் லைக் பெக்கம், கல் ஹோ ந ஹோ மாதிரி பல படங்களில் தலை காட்டி இருக்கிறார். முக்கால்வாசி சுர் என்று பேசும் பாட்டி ரோல். இவரையும் recognize செய்த இந்திய அரசுக்கு ஒரு சபாஷ்!

    பத்மபூஷன் விருதுகள்:

இளையராஜா, ரஹ்மான், ஆமிர் கான் ஆகியவர்களை பற்றி புதிதாக சொல்ல என்ன இருக்கிறது? ஏற்கனவே எழுதிய பதிவு இங்கே.

மல்லிகா சாராபாய் பிரபல குச்சிப்புடி மற்றும் பரதநாட்டிய கலைஞர். எனக்கு அவரை தெரிந்தது பீட்டர் ப்ரூக்ஸின் மகாபாரத “நாடகம்” மூலமாகத்தான். அதில் அவர்தான் திரௌபதி. நன்றாக நடித்திருந்தார். இந்த நாடகத்தைப் பார்க்க பொறுமை வேண்டும் – ஒன்பது மணி நேர நாடகம் என்று நினைக்கிறேன். என்னைப் போல மகாபாரதப் பித்து உள்ளவர்களுக்கு அவ்வளவு கஷ்டம் இல்லை. பர்மீஸ் ராமாயணம், தாய்லாந்து ராமாயணம் மாதிரி இது பீட்டர் ப்ரூக்ஸின் மகாபாரதம். அதே கதைதான், ஆனால் வேறுபாடுகள் உண்டு. பீமனாக ஒரு ஆ ஃ பரிக்கர், துரோணராக ஒரு ஜப்பானியர் என்று பல நாட்டுக்காரர்கள் நடித்திருந்தார்கள். சாராபாய் கலக்கி இருந்தார்.

ஸ்ரீனிவாஸ் கேலே மராத்திய படங்களின் இசை அமைப்பாளர் என்று தெரிகிறது.

பத்மஸ்ரீ விருதுகள்:
ரேகாவை பற்றி தெரியாதவர்கள் யார்? ஒரு பத்து பதினைந்து வருஷம் வந்து போனாலும் கல்யுக், உம்ரா ஜான், உத்சவ் மாதிரி படங்களால் அவர் நினைவில் நிற்பார். எனக்கென்னவோ அவருக்கு வயது ஆக ஆக அழகும் கூடிக் கொண்டே போனது போல இருந்தது. அவருடைய முதல் இருபது முப்பது படங்களில் பார்க்க நன்றாகவே இருக்கமாட்டார்!

அருந்ததி நாக் நாடகக்காரர். மின்சாரக் கனவு படத்தில் அர்விந்த் சாமியின் அத்தை, கஜோல் படிக்கும் ஸ்கூல் பிரின்சிபால், nun ஆக வருபவர் என்று சொன்னால் சுலபமாகத் தெரியலாம். மறைந்த ஷங்கர் நாகின் மனைவி.

கே. ராகவன் மலையாள இசை அமைப்பாளர்.

ரெசுல் பூக்குட்டி ஸ்லம்டாக் மில்லியனர் படத்துக்கு சவுண்ட் எடிட்டிங் பிரிவில் ஆஸ்கார் பெற்றவர். இப்போதே recognize செய்தது நல்ல விஷயம்.

செய்ஃப் அலி கான் பற்றி தெரியாதவர் யார்? தில் சாத்தா ஹை மற்றும் ஓம்காரா படங்கள் அவரை நினைவில் நிறுத்தும்.

நெமாய் கோஷ் யாரென்று தெரியவில்லை. இப்படி ஒரு திரைப்பட ஒளிப்பதிவாளர் பேரைக் கேட்ட மாதிரி இருக்கிறது. தெரிந்தவர்கள் சொல்லுங்களேன்!

தொகுக்கப்பட்ட பக்கம்: ஆளுமைகள், லிஸ்ட்கள்

தொடர்புடைய பதிவுகள்:
இப்ராஹீம் அல்காஜி பற்றி ஹிந்துவில்
ஜொஹ்ரா செகல் பற்றி விக்கி குறிப்பு

மல்லிகா சாராபாயின் தளம், மல்லிகா சாராபாய் பற்றிய விக்கி குறிப்பு, பீட்டர் ப்ரூக்ஸின் மகாபாரதம் பற்றிய விக்கி குறிப்பு

ரேகா பற்றிய விக்கி குறிப்பு
அருந்ததி நாக் பற்றிய விக்கி குறிப்பு
கே. ராகவன் பற்றிய விக்கி குறிப்பு, மேலும் ஒரு கட்டுரை
ரெசுல் பூக்குட்டி பற்றிய விக்கி குறிப்பு
செய்ஃப் அலி கான் பற்றிய விக்கி குறிப்பு

ராஜா, ரஹ்மானுக்கு பத்மபூஷன்
பத்மவிபூஷன்/பத்மபூஷன்/பத்மஸ்ரீ விருது பெற்ற தமிழர்கள்
இந்திரா பார்த்தசாரதிக்கு பத்மஸ்ரீ
2010 பத்மவிபூஷன்/பத்மபூஷன்/பத்மஸ்ரீ விருது லிஸ்ட்
2009 – விவேக்குக்கெல்லாம் பத்மஸ்ரீயா?
2009 – ஜெயகாந்தனுக்கு பத்ம பூஷன்
2009 பத்ம விபூஷன்/பூஷன்/ஸ்ரீ விருதுகள்

ராஜாவுக்கும் ரஹ்மானுக்கும் பத்ம பூஷன்


இரண்டு பேருக்கும் எல்லா தகுதியும் இருக்கிறது. வாழ்த்துக்கள்!

ரஹ்மானுக்கு இருக்கும் அளவுக்கு புகழ் இளையராஜாவுக்கு இல்லைதான். ஆனால் ரஹ்மானுக்கு விருது கொடுக்கும்போது ராஜாவை மறந்துவிடவில்லை என்பது சந்தோஷமான விஷயம்.

எம்எஸ்வியை மட்டும் யாரும் கண்டுகொள்வதே இல்லை. ராஜாவுக்கு இருக்கும் புகழ் கூட அவருக்கு இல்லைதான். ஆனால் அவர் எந்த விதத்திலும் இவர்கள் இருவருக்கும் சளைத்தவர் இல்லை. குறைந்த பட்சம் ஒரு பத்ம ஸ்ரீயாவது கொடுக்கக் கூடாதா என்று ஆதங்கமாக இருக்கிறது.

அப்புறம் ஆமிர் கானுக்கு பத்ம பூஷன், செய்ஃப் அலி கானுக்கு பத்மஸ்ரீ விருது கொடுத்திருக்கிறார்கள்.

விருது பெற்றவர்களின் முழு லிஸ்டையும் இங்கே காணலாம்.

தொகுக்கப்பட்ட பக்கம்: ஆளுமைகள்

தொடர்புடைய பதிவுகள்:
ஜெயகாந்தனுக்கு பத்மஸ்ரீ
விவேக்குக்கெல்லாம் பத்மஸ்ரீயா?
2009 பத்ம விபூஷன்/பூஷன்/ஸ்ரீ விருதுகள்
விருது பெற்றவர்களின் முழு லிஸ்ட்

இயக்குனர் பாலாவுக்கு சிறந்த இயக்குனர் விருது – நான் கடவுள் படத்துக்கு


பாலா

பாலா

2008க்கான தேசிய விருதுகள் அறிவிக்கப்பட்டிருக்கின்றன. இவை ஏன் 2010இல் அறிவிக்கப்படுகின்றன என்று தெரியவில்லை. அப்புறம் நான் கடவுள் வந்து இரண்டு வருஷம் ஆகிவிட்டதா? போன வருஷம்தான் வந்தது என்று நினைவு.

பாலாவுக்கு சிறந்த இயக்குனர் விருது கிடைத்திருக்கிறது. – “For its powerful handling of an extraordinary subject that focuses on marginal characters with great convection” என்று ஜூரி குழுவினர் சொல்லி இருக்கிறார்கள். பாலாவுக்கு வாழ்த்துகள்!
ஆனால் இந்த படம் உலக மகா சிறந்த படம் என்றெல்லாம் சொல்வதற்கில்லை. வித்தியாசமான களம் என்பது வரைக்கும் சரி.
இதே படத்தின் மேக்கப்மேன் ஆன வி. மூர்த்திக்கு சிறந்த மேக்கப் கலைஞருக்கான விருது கிடைத்திருக்கிறது – “For its wide variety of make-up inputs to reflect the large spectrum of characters” என்று ஜூரி குழுவினர் சொல்லி இருக்கிறார்கள். உண்மைதான். குறிப்பிடப்பட வேண்டிய மேக்கப் முயற்சி.

சிறந்த தமிழ் படத்துக்கான விருது வாரணம் ஆயிரம் படத்துக்கு கிடைத்திருக்கிறது. வாரணம் ஆயிரம் நல்ல முயற்சி, ஆனால் என் கண்ணில் நினைவு வைத்துக் கொள்ள வேண்டிய படம் இல்லை.

கண்ணில் பட்ட மற்ற படங்கள்.

A Wednesday படத்துக்கு இயக்குனரின் முதல் படத்துக்கான விருது கிடைத்திருக்கிறது. “For slick and searing exposure of the tension below the normal rhythm of life and the angst of the common man in மும்பை” என்று ஜூரி குழுவினர் சொல்லி இருக்கிறார்கள். உன்னைப் போல் ஒருவன் படத்தின் ஒரிஜினல் இதுதான் என்பது தெரிந்த விஷயமே. உ.போ. ஒருவனை விட இது நன்றாக எடுக்கப்பட்ட படம்.

சிறந்த கமர்ஷியல் படம் என்று ஓயே லக்கி லக்கி ஓயே! படத்துக்கு விருது கொடுத்திருக்கிறார்கள். இதெல்லாம் ரொம்ப ஓவர். ஓயே ஜூரி ஜூரி ஓயே!

சிறந்த காரக்டர் நடிகருக்கான விருது அர்ஜுன் ராம்பாலுக்கு ராக் ஆன்! படத்துக்கு கிடைத்திருக்கிறது. கொடுக்கலாம். ஆனால் இந்த லெவல் நல்ல நடிப்பு சாதாரணம். நசீருதின் ஷாவுககே A Wednesday படத்துக்கு கொடுத்திருக்கலாம், இல்லை அதே படத்தில் அனுபம் கெர்ருக்கு கொடுத்திருக்கலாம்.

சிறந்த உடை அலங்காரத்துக்கான விருது ஜோதா அக்பரில் வேலை செய்த நீதா லுல்லாவுக்கு கிடைத்திருக்கிறது. மிக ரிச்சான உடைகள். கொடுக்கலாம்தான். இதே படத்தில் ஒரு பாட்டுக்காக (அஜீம் ஓ ஷாஹென்ஷா) சின்னி பிரகாஷுக்கும் ரேகா பிரகாஷுக்கும் விருது கொடுத்திருக்கிறார்கள். எனக்கு பாட்டு நினைவில்லை.

மும்பை மேரி ஜான் படத்தில் ஸ்பெஷல் எஃபெக்ட்சுக்குக்காக Tata Elxsi நிறுவனத்தை சேர்ந்த கோவர்த்தனத்துக்கு விருது கொடுத்திருக்கிறார்கள். மும்பை மேரி ஜானில் நினைவில் நிற்பது ஸ்பெஷல் எஃபெக்ட்ஸ் இல்லை, அதனால் எனக்கு ஒன்றும் சொல்வதற்கில்லை.

முழு விவரங்களையும் இங்கே காணலாம்.

ஜூரி குழுவின் தலைவர் ஷாஜி கருண். நக்மா, அர்ச்சனா ஆகியோர் ஜூரி குழுவில் உறுப்பினர்கள்.

தமிழில் விருதுக்காக அனுப்பப்பட்ட படங்கள்:
அபியும் நானும்
அசோகா (இது என்ன படம், கேள்விப்பட்டதே இல்லையே?)
தசாவதாரம்
தனம்
மெய்ப்பொருள் (இது அமெரிக்காவில் தயாரிக்கப்பட்ட படம் என்று தெரியும்)
முதல் முதல் முதல் வரை (இது என்ன படம், கேள்விப்பட்டதே இல்லையே?)
நான் கடவுள்
பிரிவோம் சிந்திப்போம்
பூ
சக்கரக்கட்டி
சுப்ரமணியபுரம்
வல்லமை தாராயோ
வண்ணத்துப்பூச்சி

எல்லா மொழிகளிலிருந்து அனுப்பப்பட்ட படங்களின் லிஸ்டை இங்கே காணலாம்.

தொகுக்கப்பட்ட பக்கம்: லிஸ்ட்கள்

தொடர்புடைய பதிவுகள்:
தசாவதாரம் விமர்சனம்
நான் கடவுள் விமர்சனம்
சுப்ரமணியபுரம் விமர்சனம்
வல்லமை தாராயோ படத்தில் ஒரு பாட்டு
ஏழாம் உலகம் பற்றி பக்ஸ், ஏழாம் உலகம் பற்றி வெங்கட் சாமிநாதன், வெங்கட் சாமிநாதனின் விமர்சனம் பற்றி ஆர்வி, ஏழாம் உலகம்-ஸ்லம்டாக் மில்லியனர்-நான் கடவுள்

ஆயிரத்தில் ஒருவன் (பழைய படம்)


ஆயிரத்தில் ஒருவன் படத்தைப் பற்றி பரபரப்பாக இருக்கிறது. எனக்குப் பிடித்த ஆயிரத்தில் ஒருவன் எம்ஜிஆர் படம்தான். அதைப் பற்றி ஜெயலலிதா நினைவு கூர்கிறார்.

தொகுக்கப்பட்ட பக்கம்: எதுவுமில்லை. ஆனால் லக்கி லுக்கின் பதிவை இங்கே இணைத்திருக்கிறேன்.

தொடர்புடைய பதிவுகள்: என் விமர்சனம்

தமிழ் மாதங்கள் – Updated


பொங்கல் அன்றைக்கு மீண்டும் எழுத ஆரம்பிக்கலாம் என்று நினைத்திருந்தேன். 1960-இல் வந்த தமிழ் படங்களைப் பற்றி எழுதலாம் என்று நினைத்துக் கொண்டிருந்தேன். ஆனால் இந்த 1960-ஆம் வருஷம் அவ்வளவாக சுவாரசியப்படவில்லை. ஆஹா இந்தப் படம் பிடிக்குமே என்று தோன்ற வேண்டாமா? அதனால் இப்படி ஆரம்பிக்க வேண்டாம் என்று இன்றைக்கு வேறு மாதிரி தமிழ் மாதங்களைப் பற்றி வந்த பாட்டு லிஸ்ட் போடுகிறேன்.

மேலும் பாட்டுகளை கொடுத்திருக்கும் கோகுலுக்கும் நக்கீரனுக்கும் நன்றி!

தை
தை என்றாலே தை பிறந்தால் வழி பிறக்கும் தங்கமே தங்கம்தான்.
மகாநதியிலிருந்து தைப் பொங்கலும் பொங்குது (கோகுலுக்கு நன்றி!)
மாசிக்கு இரண்டு நல்ல பாட்டு.
மாசி மாசக் கடைசியிலே மச்சான் வந்தாரு (எம்எஸ்வி இதில் டொய்ங் டொய்ங் என்று ம்யூசிக் போடுவது எனக்கு பிடித்தமான ஒன்று. ஒரிஜினல் தோ ஆங்கேன் பாரா ஹாத்திலும் இதே மாதிரி டொய்ங் டொய்ங் ம்யூசிக் உண்டு.) அடுத்த வரி “பங்குனி மாசம் பாக்கு வச்சு பரிசம் போட்டாரு”, அதனால் இதை பங்குனிக்கும் வைத்துக் கொள்ளலாம்.
இன்னொன்று மாசி மாசம் ஆளான பொண்ணு மாமன் எனக்குத்தான்.
பங்குனிக்கு ஒன்றும் தெரியவில்லை.
நக்கீரன் பங்குனி போய் சித்திரை வந்தால் பத்திரிகை வந்திடும் என்று இன்னொரு பாட்டை குறிப்பிடுகிறார். இதை பங்குனி, சித்திரை இரண்டு மாதத்துக்கும் வைத்துக் கொள்ளலாம். பாட்டைத்தான் நான் கேட்டதே இல்லை, என்ன படம் என்றும் தெரியவில்லை.
சித்திரை
சித்திரை மாதம் பௌர்ணமி நேரம் – ராமன் எத்தனை ராமனடி எனக்கு பிடித்த சிவாஜி படங்களில் ஒன்று. சிவாஜியின் பிற படங்களையும், நாடகங்களையும் திறமையாக உள்ளே கொண்டு வந்திருப்பார்கள்.
வைகாசி?
ஆனி?
ஆடிக்கு ஒரு இரண்டு பாட்டு
ஆடி வெள்ளி தேடி உன்னை என்று ஒரு நல்ல பாட்டு இருக்கிறது. என்ன படம் என்று நினைவில்லை. ஏதோ பாலச்சந்தர் படம். மூன்று முடிச்சு! இதுவும் அந்தாதி மாதிரி (வசந்த கால நதிகளிலே மாதிரி)வீடியோவை நேரடியாக இங்கே போட முடியவில்லை, இந்த சுட்டியில் பார்க்கலாம்.
கோகுல் ஆடி மாதத்துக்கு இன்னொரு பாட்டு கொடுத்திருக்கிறார். பொன்னுமணி என்ற ஒரு படத்தில் ஆடிப் பட்டம் தேடித் பாத்து விதைக்கணும் பொன்னையா என்று ஒரு பாட்டாம். பாட்டும் கேட்டதில்லை, படமும் பார்த்ததில்லை – கேள்வியே பட்டதில்லை.
ஆவணிக்கு ஒரு இரண்டு பாட்டு
மாதமோ ஆவணி இருக்கவே இருக்கிறது. உத்தரவின்றி உள்ளே வா பக்ஸுக்கு பிடித்த படங்களில் ஒன்று.
நக்கீரன் ஆவணி மாதத்துக்கு இன்னொரு நல்ல பாட்டு கொடுத்திருக்கிறார். பாமா விஜயம் படத்திலிருந்து ஆணி முத்து வாங்கி வந்தேன் ஆவணி வீதியிலே. கவனியுங்கள் அது ஆணி முத்து, ஆனி முத்து இல்லை.
புரட்டாசி
ஐப்பசி
வில்லன் படத்திலிருந்து ஆடியில காத்தடிச்சா ஐப்பசியில் மழையடிக்கும் (கோகுலுக்கு நன்றி!). இதை ஆடிக்கும் வைத்துக் கொள்ளலாம், ஐப்பசிக்கும் வைத்துக் கொள்ளலாம். ஐப்பசிக்கு வேறு பாட்டே இல்லாததால் இங்கே போட்டுவிட்டேன். வில்லன் படம் பார்த்தேன் ஆனால் இந்த பாட்டு நினைவில்லை.
கார்த்திகை
மலைக் கோட்டை மலைக்கோயில் வாசலில் கார்த்திகை தீபம் மின்னுதே (திருத்திய கோகுலுக்கு நன்றி!) வீரா படத்திலிருந்து. நல்ல பாட்டு.
தேவதை படத்திலிருந்து தீபங்கள் பேசும் திரு கார்த்திகை மாசம்(கோகுலுக்கு நன்றி!). நல்ல பாட்டு, இந்த பாட்டுதான் யோசித்து யோசித்துப் பார்த்தேன், நினைவே வரவில்லை.
மார்கழி
மார்கழிக்கு எப்போதுமே மாதங்களில் அவள் மார்கழிதான்! என்ன அருமையான பாட்டு – காலங்களில் அவள் வசந்தம்! எம்எஸ்வி நீர் ஒரு ஜீனியஸ்! ரொம்ப லைட்டான, ஆனால் சுகமான ஒரு மெட்டு. இது வெறும் லிஸ்ட் – ஆனால் கண்ணதாசனின் ஜீனியஸ் இதை எங்கேயோ கொண்டுபோகிறது. (வைரமுத்து போட்ட ஒரு லிஸ்ட் – கண்ணுக்கு மை அழகு; நல்ல மெட்டை அவ்வைக்கு கூன் அழகு என்றெல்லாம் எழுதி கொலை செய்திருப்பார்!)
சங்கமம் படத்திலிருந்து மார்கழித் திங்கள் அல்லவா (கோகுலுக்கு நன்றி!)
மே மாதம் படத்திலிருந்து மார்கழிப் பூவே (கோகுலுக்கு நன்றி!)
மௌன கீதங்கள் படத்திலிருந்து – மாதமோ மார்கழி மாதம் நேரமோ ராத்திரி நேரம்

விட்டுப் போன மாதங்கள், இல்லை பாட்டுகளை (ஆடியோ, வீடியோ சுட்டி கொடுத்தால் இன்னும் உத்தமம்) சொல்லுங்கள், இங்கே சேர்த்துவிடலாம்!

பதிவு தொகுக்கப்பட்டிருக்கும் பக்கம்: லிஸ்ட்கள்

கண் போன போக்கிலே கை போகலாமா தொடர்ச்சி


சாரதா, கோகுல் இருவருக்கும் நன்றி!

சரி சொல்லிவிட்டீர்கள். 1960-இல் வந்த படங்களிலிருந்து ஆரம்பிக்கிறேன். வாரம் ஒன்றிரண்டு படத்தைப் பற்றியாவது எழுத முயற்சிக்கிறேன். அதுவும் சாரதாவும் சேர்ந்துகொண்டால் பஹூ குஷி பஹூ குஷி! (தூக்குத்தூக்கி பாலையா மாதிரி படித்துக் கொள்ளவும்)

கோகுல், மதிப்பீடுகளும் எழுத முயற்சிக்கிறேன்.

தொடர்புடைய பதிவுகள்

கண் போன போக்கிலே கை போகலாமா பகுதி 1

கண் போன போக்கிலே கை போகலாமா?


2008-இல் சன் டிவியில் வார நாட்களில் பழைய தமிழ் படமாக போட்டுக் கொண்டிருந்தார்கள். எனக்கு பழைய படம் – திராபையாக இருந்தாலும் – பார்க்க பிடிக்கும். சும்மா விளையாட்டாக பார்த்த படத்துக்கு எல்லாம் விமரிசனம் எழுத ஆரம்பித்தேன். அதையும் படிக்க ஒரு பத்து பேர் வந்தீர்கள். சந்தோஷமாக இருந்தது.

சன் டிவி படம் போடுவதை நிறுத்தியதும் இந்த ப்ளாக்கின் input stream வற்றிவிட்டது. அப்புறம் எங்கேயாவது (விகடன் பொக்கிஷத்தில் வரும் விமர்சனம், ராண்டார்கை ஹிந்துவில் எழுதும் பத்திகள், யாராவது எனக்கு பிடித்த படம் என்று போடும் லிஸ்ட்) ஏதாவது கண்ணில் பட்டால் அதைப் பற்றி எழுத ஆரம்பித்தேன். அது ரெகுலராக எழுத முடிவதில்லை. கண்ணில் பட்டால்தானே எழுதத் தோன்றுகிறது? கர்நாடகாவில் வெள்ளம் வந்தால்தான் காவிரியில் தண்ணீர் வரும், அந்த மாதிரிதான் யாராவது ஏதாவது எழுதினால் நானும் அதை வைத்து மொக்கை போட்டுக் கொண்டிருக்கிறேன். இதில் நடுவில் கம்ப்யூட்டர் தகராறு வேறு, மாதக் கணக்கில் எழுத முடியவில்லை.

என் கனவுலகத்தில் பழைய சினிமா என்று இந்த ப்ளாகுக்கு வந்து நீங்கள் தேடினால் – “சபாபதி” என்று வைத்துக் கொள்வோமே? – என் விமர்சனம், எனக்கு பிடித்த சில பதிவர்கள் – சூர்யா மாதிரி – ஏதாவது எழுதி இருந்தால் அந்த பத்தி, பழைய பத்திரிகை விமர்சனம் (விகடன், குமுதம், கல்கி, கணையாழி மாதிரி பத்திரிகைகள்), பாட்டு, வீடியோ லிங்க் எல்லாம் கிடைக்க வேண்டும். இது கஷ்டம்தான். இப்போது இருக்கும் பத்திகளையே navigate செய்வது நச்சுப் பிடித்த வேலை. கனவுலகம் வெகு தூரத்தில் இருக்கிறது. கூரை ஏறி கோழி பிடிக்காதவன் வானம் ஏறி வைகுண்டம் போவானாம், டே என்னை ஏய்க்காதே! ஹ! ஹ! ஹஹ்ஹஹா! என்று என் மனசாட்சியும் சிவாஜி மாதிரி சிரிக்கிறது.

இந்த வருஷம் ரெகுலராக எழுத வேண்டும் என்று ஆசைப்படுகிறேன். வாரத்துக்கு ஒரு பத்தி என்றாலும் சரி, நாளைக்கு பத்து பத்தி என்றாலும் சரி, என்ன வரப் போகிறது, எப்போது வரப் போகிறது என்று தெளிவாக சொல்லி விட விரும்புகிறேன். முதலில் என்ன எழுத வேண்டும் என்று நிர்ணயித்துக் கொள்ள வேண்டும் இல்லையா?

இதை படிக்கும் 42 பேருக்கு ஒரு கேள்வி. என்ன மாதிரி பதிவுகள் உங்களுக்கு பிடித்திருக்கிறது? நீங்கள் இது வரை படித்ததில் உங்களுக்கு மிகவும் பிடித்திருந்த ஒன்றிரண்டு பத்திகள் என்ன என்று சொல்லுங்கள். அது ஓரளவு உதவியாக இருக்கும். உங்கள் பதில் நிச்சயமாகத் தேவை. இல்லை என்றால் மீண்டும் கண் போன போக்கிலே கை போக வேண்டியதுதான்!

Follow

Get every new post delivered to your Inbox.

Join 216 other followers