பசங்க திரைப்படத்துக்கு விருதுகள்


2009-ஆம் ஆண்டுக்கான தேசிய விருதுகள் அறிவிக்கப்பட்டிருக்கின்றன. தமிழிலிருந்து பசங்க திரைப்படம் பல விருதுகளை வென்றிருக்கிறது. இந்த ஒரு தமிழ் படத்துக்குத்தான் விருதுகள் கிடைத்திருக்கின்றன.

படத்தில் “ஹீரோவாக” நடித்த கிஷோரும், “வில்லனாக” நடித்த ஸ்ரீராமும் சிறந்த குழந்தை நட்சத்திரத்துக்கான விருதுகளை பெற்றிருக்கிறார்கள். சிறந்த திரைக்கதைக்கான விருதை (இயக்குனர்) பாண்டியராஜ் பெற்றிருக்கிறார். சிறந்த தமிழ் படமாகவும் (தயாரிப்பாளர் சசிகுமார்) தேர்ந்தெடுக்கப்பட்டிருக்கிறது.

பக்ஸுக்கு பிடித்த படம். பக்ஸ், விமர்சனம் எழுதுகிறாயா?

பழசி ராஜா திரைப்படத்துக்காக இளையராஜா சிறந்த இசையமைப்பாளர் விருது பெறுகிறார் (shared with Amit Trivedi for Dev D). ஆஸ்கார் புகழ் ரசூல் பூக்குட்டியும் இந்த படத்திற்காக சிறந்த ஒலி அமைப்பு விருது பெறுகிறார் (Shared with Subhash Sahoo for Kaminey and Anup Dev for 3 Idiots). படத்துக்கு ஸ்பெஷல் ஜூரி அவார்டும் (shared with Kaminey and Kutty Srank) கிடைத்திருக்கிறது. படத்திலிருந்து ஒரு பாட்டு கீழே.

2009-இன் சிறந்த படமாக மம்முட்டி நடித்து ஷாஜி கருண் இயக்கிய குட்டி ஸ்ரான்க் என்ற திரைப்படம் தேர்வு செய்யப்பட்டிருக்கிறது. குட்டி ஸ்ரான்க் திரைப்படத்துக்கு சிறந்த ஒளிப்பதிவாளர் (அஞ்சலி சுக்லா), சிறந்த திரைக்கதை (பி. எஃப். மாத்யூஸ்+ஹரிகிருஷ்ணா, award shared with Pasanga and a Kannada movie), சிறந்த ஆடை அலங்காரம் (ஜெயகுமார்), மற்றும் ஸ்பெஷல் ஜூரி அவார்டும் கிடைத்திருக்கிறது.

3 இடியட்ஸ் திரைப்படம் சிறந்த பாப்புலர் திரைப்படமாக தேர்ந்தெடுக்கப்பட்டிருக்கிறது. லாகூர் என்ற படம் இயக்குனருக்கு (சஞ்சய் பூரண் சிங் சவுஹான்) சிறந்த முதல் படமாகவும், டெல்லி-6 தேசிய ஒருமைப்பாட்டுக்கான நர்கிஸ் விருதும், வெல் டன் அப்பா (ஷ்யாம் பெனகல்) சமுதாய பிரச்சினைகளை சிறப்பாக காட்டியதற்கும் விருதுகளை வென்றிருக்கின்றன. லாகூரில் நடித்ததற்காக ஃபரூக் ஷேக் சிறந்த குணச்சித்திர நடிகர் விருது வென்றிருக்கிறார்.

அபோஹோமன் என்ற வங்காள மொழி திரைப்படத்தை இயக்கிய ரிதுபர்னோ கோஷ் சிறந்த இயக்குனர் விருதை வென்றிருக்கிறார். இதே படத்தில் நடித்த அனன்யா சட்டர்ஜிக்கு சிறந்த நடிகை விருதும் கிடைத்திருக்கிறது.

அமிதாபுக்கு பா படத்துக்காக சிறந்த நடிகர் விருது. இதே படத்தில் நடித்த அருந்ததி நாகுக்கு சிறந்த குணசித்திர நடிகை விருதும் கிடைத்திருக்கிறது. சிறந்த மேக்கப்புக்கான அவார்டும் (கிறிஸ்டியன் டின்ஸ்லி+டொமினி டில்) இந்த படத்துக்கு கிடைத்திருக்கிறது. இந்த திரைப்படம் சிறந்த ஹிந்தி மொழி படமாகவும் தேர்ந்தெடுக்கப்பட்டிருக்கிறது.

இந்திய அரசின் அறிவிப்பை இங்கே காணலாம்.

தொகுக்கப்பட்ட பக்கம்: விருதுகள்

தொடர்புடைய பதிவுகள்:
விருதுகள் பற்றிய இந்திய அரசின் அறிவிப்பு
விருது பற்றி பாண்டியராஜ்
வெல் டன் அப்பா
3 இடியட்ஸ்(3 Idiots), விகடன் விமர்சனம், Lessons from 3 Idiots

Advertisements

வெல் டன் அப்பா (Well Done Abba)


ரொம்ப நாளாச்சு ஒரு திரைப்படத்தைப் பற்றி எழுதி. இன்றைக்கு ஒன்று.

ஏதோ ஒரு படத்தில் வடிவேலு கிணறைக் காணோம் என்று போலீசில் புகார் செய்வார். (என்ன படம்?) இந்த படத்துக்கு அதுதான் கதை.

அர்மான் அலி பெண்ணுக்கு கல்யாணம் செய்து வைக்க கிராமத்துக்கு திரும்பி வருகிறார். ஊரில் தண்ணீர் பஞ்சம். அரசு கிணறு வெட்ட மான்யம் கொடுக்கிறதே, அதை வைத்து கிணறு வெட்டி ஊரின் கஷ்டத்தை குறைக்கலாம் என்று நினைக்கிறார். மான்யம் வாங்க தாசில்தார், கிளார்க், எஞ்சினியர் எல்லாருக்கும் லஞ்சம் கொடுக்க வேண்டி இருக்கிறது. என்ன செய்வது என்று தெரியாமல் அர்மான் அலி விழிக்கிறார். முதல் கட்ட மான்யத்தில் கொடுப்பதாக ஒத்துக் கொண்ட லஞ்சத்தை கொடுத்துவிட்டுப் பார்த்தால் கிணறு வெட்ட பணம் போதாது. கிணற்றை வெட்டினால்தான் அது மான்யம்; இல்லாவிட்டால் அது லோன், திருப்பித் தர வேண்டும். என்ன செய்வது என்று தெரியாமல் அர்மான் அலி விழிக்கிறார். பொய் ஃபோட்டோக்களை வைத்து அடுத்த கட்ட மானியம் வாங்கி அதை வைத்து முதல் கட்ட வேலையை முடிக்குமாறு எஞ்சினியர் சொல்கிறார். திருப்பி லோன், லஞ்சம், லோன், லஞ்சம் என்று போகிறது. எல்லா பணமும் வந்து கொடுக்க வேண்டியதை எல்லாம் கொடுத்த பிறகு கிணறு வெட்ட தரையில் மேல் போட்ட வெள்ளை வட்டம்தான் மிச்சம். கடுப்பாகும் அர்மான் அலியும் அவர் மகளும் கிணறு காணவில்லை என்று புகார் செய்கிறார்கள். கிணறு இருந்த ஃபோட்டோ இருக்கிறது, அதைப் பார்த்ததாக கையெழுத்துப் போட்ட எஞ்சினியர் இருக்கிறார், அங்கே தண்ணீர் அருமையாக இருந்ததாக எழுதிக் கொடுத்த ஊர் பஞ்சாயத்து தலைவி இருக்கிறாள், எல்லா ஆதாரமும் இருக்கிறது, கிணறு மட்டும் இல்லை. இப்படி இந்த ஏரியாவில் 70 கிணறு “இருப்பதாகத்” தெரிகிறது. போராட்டம், மந்திரி சமாளிப்பு, கடைசியில் மந்திரி மீண்டும் கிணறை கட்டித் தருகிறார்.

நல்ல நடிப்பு, நல்ல கதை எல்லாம் இருக்கிறது. அதுவும் மந்திரியாக வருபவர், எஞ்சினியர், அர்மான் அலியாக நடிக்கும் பொமன் இரானி நன்றாக நடித்திருக்கிறார்கள். ஆனால் சினிமாவில் விறுவிறுப்பு இல்லை. என்னவோ அத்தைப் பாட்டி கதை போல மெதுவாக செல்கிறது. நடுவில் ஒரு காதல், ஒரு மாமா, அராபிய ஷேக்குகள் ஏழை முஸ்லிம் பெண்களை கல்யாணம் செய்து கொள்வது என்று கிளைக் கதைகள் எல்லாம் இழுவையாக இருக்கிறது.

மேரி பன்னோ ஹோஷியார் பாட்டு நன்றாக இருக்கிறது. பழைய பாட்டு எதையோ நினைவுபடுத்துகிறது, ஆனால் என்ன என்று தெரியவில்லை. தெரிந்தவர்கள் சொன்னால் என் தலையில் இருக்கும் கொஞ்சம் முடியாவது மிஞ்சும்.

நினைவு வந்துவிட்டது. சையான் ஜூட்டோன் கா படா சர்தாஜ் நிக்லா என்ற பாட்டு, தோ ஆங்கேன் பாரா ஹாத் திரைப்படத்திலிருந்து.

(தோ ஆங்கேன் பாரா ஹாத் தமிழில் எம்ஜிஆர் நடித்து பல்லாண்டு வாழ்க என்று வந்தது. மாசி மாசக் கடைசியிலே பாட்டில் வரும் டொய்ங் டொய்ங் இசையை இதில் கேட்கலாம்.)

2009-இல் வந்த படம். பொமன் இரானி (இரண்டு ரோல்), மினிஷா லம்பா, சமீர் தத்தானி, ரவி கிஷன், சலீம் கவுஸ், இலா அருண், சோனாலி குல்கர்னி, ரஜத் கபூர், யஷ்பால் ஷர்மா, ராஜேந்திர குப்தா என்று பலர் நடித்திருக்கிறார்கள். சாந்தனு மொய்த்ரா இசை.

எனக்கு பொதுவாக ஷ்யாம் பெனகல் இயக்கிய திரைப்படங்கள் பிடிக்கும். கல்யுக் நான் பார்த்த சிறந்த படங்களில் ஒன்று. அங்குர், நிஷாந்த், மந்தன், ஜூனூன் என்று ஒரு லிஸ்ட் இருக்கிறது. இந்த படமும் above average, பார்க்கக் கூடிய படம்தான். ஆனால் அவருடைய பொற்காலம் முடிந்துவிட்டது என்றுதான் சொல்ல வேண்டும். பத்துக்கு 6.5 மார்க். B- grade.

தொகுக்கப்பட்ட பக்கம்: படங்களின் பட்டியல்

என் டாப் டென் இந்திய படங்கள்


  1. ஹிரிஷிகேஷ் முகர்ஜியின் ஆனந்த்
  2. ஃபர்ஹான் அக்தாரின் தில் சாத்தா ஹை
  3. கன்னட படம் – இயக்குனர் தெரியவில்லை. தப்பலியு நீனடே மகனே (எஸ்.எல். பைரப்பாவின் நாவல்)
  4. சத்யஜித் ரேயின் அபூர் சன்சார்
  5. ஷோலே
  6. சத்யஜித் ரேயின் பதேர் பாஞ்சாலி
  7. தீவார்
  8. மாயா பஜார் (தெலுங்கு)
  9. குல்சாரின் நம்கீன்
  10. குல்சாரின் அங்கூர்

இதை தவிர honorable mention என்று பல இருக்கின்றன. ஞாபகம் வருபவை.
மெஹ்பூபின் மதர் இந்தியா
குல்சாரின் மௌசம், கிதாப், மாச்சிஸ்
மகேஷ் பட்டின் அர்த்
கோவிந்த் நிஹலானியின் அர்த் சத்யா, துரோக கால் (தமிழில் குருதிப் புனல்)
விஷால் பரத்வாஜின் மக்பூல், ஓம்காரா
ஷ்யாம் பெனகலின் மந்தன், அங்கூர், நிஷாந்த், ஜுனூன்
ராஜ் கபூரின் ஜாக்தே ரஹோ, ஸ்ரீ 420
பாசு பட்டாச்சார்யாவின் தீஸ்ரி கசம்
சத்யஜித் ரேயின் மகாநகர்
விஜயா ஸ்டுடியோஸின் மிஸ்ஸம்மா, குண்டம்மா கதா
ராம் கோபால் வர்மாவின் கம்பெனி
கிரிஷ் கார்னாடின் வம்ச விருக்ஷா, உத்சவ்
அபர்ணா சென்னின் பரோமா
மிஸ்டர் அண்ட் மிசஸ் அய்யர் (யார் இயக்கியது?)
திலீப் குமாரின் கங்கா ஜம்னா
நரம் கரம் (யார் இயக்கியது?)

சில தன்னிலை விளக்கங்கள். நான் மலையாளப் படங்களை அதிகமாக பார்த்ததில்லை. வீடியோ பார்க்கும் காலத்தில் நல்ல மலையாளி நண்பர்கள் இல்லாததுதான் காரணம் என்று நினைக்கிறேன். எனக்கும் அதிகமாக தெரியாது. தப்பலியு நீனடே மகனே தற்செயலாக பெங்களூர் திரைப்பட விழாவில் பார்த்தது. விஜயா ஸ்டுடியோஸ் படங்கள் ஹைதராபாத்தில் வசித்தபோது தேடித் போய் பார்த்தவை.

பொதுவாக இன்றைய ஹிந்திப் படங்களில் வருஷத்துக்கு நாலைந்து நல்ல படம் வருகின்றன. ஆரோக்யமான விஷயம்.

தொகுப்பு இடம் பெறும் பக்கம்: லிஸ்ட்கள்

தொடர்புடைய பதிவுகள்:
டாப் டென் உலக சினிமா
டாப் டென் தமிழ் சினிமா
கமலுக்கு பிடித்த தமிழ் திரைக்கதைகள்
நடிகர் சூர்யாவுக்கு பிடித்த படங்கள்
பிரகாஷ் ராஜுக்கு பிடித்த பத்து படங்களைப் பற்றி நான், அவற்றைப் பற்றி கிருஷ்ணமூர்த்தி
பாரதிராஜாவுக்கு பிடித்த பத்து படங்கள்
அஞ்சும் ராஜாபலியின் பிடித்த படங்கள் லிஸ்ட்
NCERT பாடப் புத்தகத்தில் இடம் பெறும் படங்கள்

என் டாப் டென் உலக சினிமா லிஸ்ட்


ரெகுலராக எழுதுவது என்று சொல்லிவிட்டேன். முயற்சியாவது செய்ய வேண்டாமா? உங்கள் அதிர்ஷ்டம் அவ்வளவுதான்.

எத்தனை நாள்தான் அடுத்தவர்களுக்கு பிடித்த படங்களை பற்றி எழுதுவது? இன்றைக்கு எனக்கு மிகவும் பிடித்த பத்து படங்கள். (இது தர வரிசைப்படி எல்லாம் இல்லை.) பாஸ்டன் பாலாவின் 10hot தளத்தில் இடம் பெறுகிறதா என்று பார்ப்போம்.

1. அகிரா குரோசாவா இயக்கிய இகிரு – கான்சரால் இறக்கப் போகிறோம் என்று தெரிந்ததும் ஒரு அரசு அதிகாரி (நம்மூர் கவர்ன்மென்ட் ஆஃபீசர் மாதிரி ஒரு வேலையும் செய்யாமல் எல்லாவற்றுக்கும் ரூல்ஸ் படி முட்டுக்கட்டை போடுபவர்) வாழ்விற்கு அர்த்தத்தை தேடுகிறார்.

2. அகிரா குரோசாவா இயக்கிய ரான் – ஜப்பானிய சூழ்நிலையில் ஷேக்ஸ்பியரின் கிங் லியர்

3. அகிரா குரோசாவா இயக்கிய ராஷோமான் – ஒரு இறப்பு, பல கோணங்களில்

4. சத்யஜித் ரேயின் சாருலதா – பத்தொன்பதாம் நூற்றாண்டின் பிற்பகுதியில் அண்ணிக்கும் மச்சினனுக்கும் உள்ள நட்பு எல்லை மீறுகிறதோ?

5. சத்யஜித் ரேயின் அபராஜிதோ – ஏழை தாயும் படிக்கும் மகனும்

6. ஷ்யாம் பெனகலின் கல்யுக் – மகாபாரத காரக்டர்கள் பம்பாயில் ஒரு தொழில் போட்டியில். எனக்கு மகாபாரதத்தின் மீது பயங்கர பித்து.

7. ஸ்டான்லி குப்ரிக்கின் டாக்டர் ஸ்ட்ரேஞ்ச்லவ் – இந்த படம் பார்க்கும்போது கீழே உருண்டு புரண்டு சிரித்திருக்கிறேன்.

8. க்வெண்டின் டாரன்டினோவின் பல்ப் ஃபிக் ஷன் – மிக பிரமாதமான திரைக்கதை.

9. குந்தன் ஷாவின் ஜானே பி தோ யாரோ – இது எங்களுக்கு ஒரு cult film. விழுந்து விழுந்து சிரித்திருக்கிறோம்.

10. வால்ட் டிஸ்னியின் ஜங்கிள் புக்

டாப் டென் என்று எடுப்பது கொஞ்சம் கஷ்டமான வேலை. திடீரென்று அந்த படம் மறந்துவிட்டதோ என்று ஞாபகம் வரும். அதனால் இந்த லிஸ்ட் மாறலாம். இப்போதைக்கு ஞாபகம் வரும் படங்களில் டாப் டென் என்று வைத்துக் கொள்ளுங்களேன்.

தமிழ் படங்கள் எதுவுமே தரவில்லையா என்று கேட்பவர்களுக்கு: நல்ல படங்கள் நிறைய உண்டு. ஆனால் தமிழ் தெரியாத நண்பர்களுக்கு நான் சிபாரிசு செய்யக் கூடிய படங்கள் மிகக் குறைவு. அந்த லிஸ்டையும் இங்கேயே எழுதிவிட்டால் அடுத்த பதிவுக்கு என்ன செய்வது? 🙂

IMDB-இல் இந்த படங்கள்:
1. இகிரு
2. ரான்
3. ராஷோமான்
4. சாருலதா
5. அபராஜிதோ
6. கல்யுக்
7. டாக்டர் ஸ்ட்ரேஞ்ச்லவ்
8. பல்ப் ஃபிக் ஷன்
9. ஜானே பி தோ யாரோ
10. ஜங்கிள் புக்

தொகுப்பு இடம் பெறும் பக்கம்: லிஸ்ட்கள்

தொடர்புடைய பதிவுகள்:
கமலுக்கு பிடித்த தமிழ் திரைக்கதைகள்
நடிகர் சூர்யாவுக்கு பிடித்த படங்கள்
பிரகாஷ் ராஜுக்கு பிடித்த பத்து படங்களைப் பற்றி நான், அவற்றைப் பற்றி கிருஷ்ணமூர்த்தி
பாரதிராஜாவுக்கு பிடித்த பத்து படங்கள்
அஞ்சும் ராஜாபலியின் பிடித்த படங்கள் லிஸ்ட்
NCERT பாடப் புத்தகத்தில் இடம் பெறும் படங்கள்

புன்னகை (Punnagai)


நான் இந்த ரெவ்யூக்களை தாமதமாகத்தான் எழுத ஆரம்பித்தேன். நான் எழுத ஆரம்பித்ததற்கு முன்னால் பார்த்த படங்கள் சிலவற்றுக்கும் விமரிசனம் எழுதலாமா வேன்டாமா என்று கொஞ்சம் குழப்பமாகத்தான் இருக்கிறது. கடைசியில் படிப்பவர்கள் தலைவிதியை யாரால் மாற்றமுடியும் என்று மனதை தேற்றிக்கொண்டு எழுத ஆரம்பித்துவிட்டேன்!

ஞாபகத்திலிருந்து எழுதப்படும் இந்த கருத்துக்களுக்கு மிகவும் டிடைலான விவரங்களை என்னால் கொடுக்கமுடியாது. (இப்போது மட்டும் கொடுக்க முடிகிறதா என்ன? பல சமயம் டைட்டில்களை மிஸ் செய்துவிடுகிறேன்). எல்லா பாட்டுக்களும் ஞாபகம் இருக்கப் போவதில்லை. படிப்பவர்கள் தங்களுக்கு நினைவிருக்கும் விவரங்களை எழுதி உதவினால் உதவியாக இருக்கும்.

“புன்னகை” படத்திலிருந்து தொடங்குகிறேன். இங்கே தொடங்க காரணம் பாலசந்தர் இதைப் பற்றி ஒரு பேட்டியில் சொன்னது – Q) Of all the films you made what is your favorite film?
A) This is the most common question put to me. This was and is a very difficult question to answer. But I personally feel that “Punnagai”, a Tamil film with Gemini Ganeshan and Nagesh in it, is one of the best films I ever made. In that film, I was really able to voice out my opinion and I was able to say something through that film. Sadly, that film did not farewell at the box office and I was not surprised…

பாலசந்தர் தமிழின் தலை சிறந்த இயக்குனர்களில் ஒருவர். ஆனால் எனக்கு தமிழின் தரத்தை பற்றி அவ்வளவு உயர்ந்த எண்ணம் இல்லை. ஒரு அகிரா குரொசவா, சத்யஜித் ரே, ஷ்யாம் பெனகல் தரத்தில் உள்ள இயக்குனர்கள் தமிழில் இல்லை. ஆனால் பாலசந்தர் தமிழின் தலை சிறந்த இயக்குனர்களில் ஒருவர் என்பதை நானும் ஏற்றுக் கொள்கிறேன். அவரை விட மணிரத்னம் ஒருவர்தான் தமிழில் நல்ல இயக்குனர் என்பது என் கருத்து. அவர் உயர்வாக கருதும் படத்திலிருந்தே ஆரம்பிப்போமே! (எனக்கு மிகவும் பிடித்த பாலசந்தர் படங்கள் வேறு இரண்டு – தில்லுமுல்லு, தண்ணீர் தண்ணீர்.)

1971இல் வெளி வந்தது. பாலசந்தரின் ஃபேவரிட் நடிகர்களான ஜெமினி, நாகேஷ், முத்துராமன், வி. கோபாலகிருஷ்ணன், ஜெயந்தி மற்றும் எஸ்.வி. சகஸ்ரநாமம், எம்.ஆர்.ஆர். வாசு, வி.எஸ். ராகவன், எஸ்.வி. ராம்தாஸ், சசிகுமார் நடித்திருக்கிறார்கள். பலருக்கும் ஒரு மேடை நாடக பாரம்பரியம் இருப்பது குறிப்பிடத்தக்கது.

இது ரிஷிகேஷ் முகர்ஜி எடுத்த “சத்யகாம்” என்ற படத்தின் தழுவல். Hindiயில் ஜெமினிக்கு பதிலாக தர்மேந்திரா, முத்துராமனுக்கு பதிலாக சஞ்சீவ் குமார், ஜெயந்திக்கு பதிலாக ஷர்மிலா தாகூர், எஸ்.வி. சகஸ்ரநாமத்துக்கு பதிலாக அஷோக் குமார், வி.எஸ். ராகவனுக்கு பதிலாக டேவிட் நடித்திருக்கிறார்கள். சத்யகாம் 1969இல் வெளி வந்தது.

காந்தியின் வழியில் நாடும், குறிப்பாக இளைஞர்களும் நம்பிக்கை இழந்துகொண்டிருந்த காலம். எப்போதும் உண்மையே பேசுவது நடக்காத விஷயம் என்று எல்லாருக்கும் தோன்ற ஆரம்பித்த காலம். இந்த கால கட்டத்தில் எந்த வித காம்ப்ரமைஸும் செய்து கொள்ளாத ஒரு மனிதனின் போராட்டம்தான் இந்த படத்தின் கதை.

கதையின் denouement நமது இதிகாச காலத்திலிருந்து வருவது. சத்யகாமன் என்ற சிறுவன், வேதம் படிக்க விரும்பி ஒரு குருகுலத்துக்கு சென்றான். அங்கே அவனுடைய குலம் கோத்திரம் பற்றி விசாரித்தார்கள். அவனுடைய அம்மாவோ பல மனிதர்களிடம் பழகியவர். அதனால் தன் அப்பா யார் என்று தெரியாது. கேள்வி கேட்கும் குருவிடம் தான் ஜபலா என்ற பெண்ணின் மகன், தந்தை பெயர் தெரியாது என்று கூச வைக்கும் உண்மையை வெளிப்படையாக சொல்கிறார். குருவும் நான் உனக்கு வேதம் படிப்பிக்க முடியும், ஆனால் நேர்மையைப் படிப்பிக்க முடியாது என்று சொல்லி அவரை தனது குருகுலத்தில் சேர்த்துக்கொள்கிறார். இந்தக் காட்சி இந்த கதையில் அற்புதமாக கையாளப்பட்டிருக்கிறது.

இவர் சத்யகாம ஜாபாலி என்றே அதற்கு பின் அறியப்பட்டார். எனக்கு தெரிந்து நம் இதிகாசங்களில் தாயின் பெயரால் அறியப்படுபவர் இவர் ஒருவரே. இந்த கதை சாந்தோக்ய உபநிஷதத்தில் சொல்லப்படுகிறது. ஜபல்பூர் இவரது நினைவாக எழுப்பப்பட்ட ஊர் என்று படித்திருக்கிறேன். ஜாபாலி ராமாயணத்திலும் வருகிறார் – அங்கே அவர் சொர்க்கம் நரகம் என்றெல்லாம் ஒன்றும் இல்லை என்றும், ராமன் பரதன் சொல்வது போல மீண்டும் அயோத்திக்கு சென்று ஆட்சியை ஏற்றுக்கொள்ள வேண்டும் என்றும் உபதேசிக்கிறார். ஜாபாலி, ராமாயணம் பற்றிய இன்னொரு வியூபாயின்டை நார்லா வெங்கடேஸ்வர ராவ் எழுதிய “சீதா ஜோஸ்யம்” என்ற தெலுங்கு நாடகத்தில் பார்க்கலாம். சாகித்ய அகாடெமி ஒரு தமிழ் மொழிபெயர்ப்பை வெளியிட்டிருக்கிறது.

மூலக்கதை வங்காள மொழியில் நாராயண் சன்யால் என்பவரால் எழுதப்பட்டது.

ஜெமினி, முத்துராமன், எம்.ஆர்.ஆர். வாசு, நாகேஷ், வி. கோபாலகிருஷ்ணன் சக மாணவர்கள். கோபி மாணவனாகவே இறந்துவிடுகிறார். இது எல்லாரையும் அழுத்தமாக பாதிக்கிறது. ஒரு முறைப்பான ஆஃபீசராக வேலைக்கு சேரும் ஜெமினி, ஒரு கட்டத்தில் ஜெயந்திக்கு அடைக்கலம் தருகிறார். ஆனால் ஜெயந்தியை அவரால் ராம்தாஸிடமிருந்து காப்பாற்ற முடியவில்லை. ராம்தாஸினால் தயாகும் ஜெயந்தியை ஜெமினி மணக்கிறார். அவராலும் ஜெயந்தி கன்னி அல்ல என்பதை மறக்க முடியவில்லை, அதனால் அவர்கள் இருவருக்கும் தாம்பத்திய உறவு இல்லை. (ஜெமினி காரக்டரின் ஒரே பலவீனம், makes him human) ஆனால் ஜெயந்தியின் மகனுக்கு ஜெமினி பூரணமான அப்பாவாக இருக்கிறார். இந்த திருமணத்தை ஆன்மிக வழியில் ஆசிரமம் நடத்தும் ஜெமினியின் தாத்தா எஸ்.வி. சகஸ்ரநாமம் ஏற்றுக் கொள்ளாமல் தனது உறவை முழுமையாக துண்டித்துக்கொள்கிறார். நேர்மையான அதிகாரி என்பதால் பல இடஙகளுக்கு பந்தாடப்படும் ஜெமினி கடைசியில் நோய் வந்து இறக்கும் தறுவாயில் இருக்கிறார். எம்.ஆர்.ஆர். வாசு லஞ்சம் கொடுத்து பணக்காரரான ஒரு காண்ட்ராக்டர். முத்துராமன் ஜெமினிக்கு அவ்வப்போது உதவி செய்யும் ஒரு அதிகாரி. ஜெமினியோடு contrast செய்ய இந்த இருவரும். ஜெமினி இறந்துவிட்டால் ஜெயந்தியும் பையனும் நடுத்தெருவில்தான் நிற்கவேண்டும். எம்.ஆர்.ஆர். வாசு ஜெமினி ஒரு ஃபைலில் கையெழுத்து போட்டால் அவரது குடும்பம் வாழ தேவையான பணம் தருவதாக சொல்கிறார். வறுமைக்கு பயப்படும் ஜெயந்தி ஜெமினியிடம் இதைப் பற்றி பிரஸ்தாபிக்கிறார். ஜெமினியும் ஜெயந்தி சொன்னால் கையெழுத்து போடுவதாக சொல்கிறார். ஜெயந்தியால் கேட்க முடியவில்லை. ஜெமினி இறக்கும்போது வரும் சகஸ்ரநாமத்திடம் சின்னப் பையனான ஜெயந்தியின் மகன் ஜெமினி தனது அப்பா இல்லை என்று வெளிப்படையாக சொல்கிறார். சிறு பையனிடமும் சத்தியத்தின் வேகத்தை ஜெமினி ஊட்டி விட்டதைப் பார்க்கும் சகஸ்ரநாமம், ஜெயந்தியை தன் மருமகளாக ஏற்றுக்கொள்கிறார். சுபம் என்று சொல்லமுடியாது, ஆனால் ஒரு நிறைவான முடிவு.

Hindiயில் படம் இன்னும் நன்றாக இருந்தது. பாலசந்தர் தேவையற்ற பல காரக்டர்களை உள்ளே நுழைத்து கதையின் ஓட்டத்தை தளர்த்திவிடுகிறார். உதாரணமாக சோரம் போகும் முத்துராமனின் மனைவி தேவையே இல்லை. நாகேஷ், மேஜர் காரக்டர்கள் தேவை இல்லை – ஆனால் ரொம்ப மோசம் என்றும் சொல்லமுடியாது. கமல் ஒரு முறை சொன்னது போல தன்னை ஒருவன் கற்பழிக்க வரும்போது “ஆணையிட்டேன் நெருங்காதே’ என்று பாட்டு பாடுவது மடத்தனமாக இருக்கிறது. ஜெயந்தி கொஞ்சம் ஓவர்ஆக்ட் செய்கிறார்.

ஜெமினி, எம்.ஆர்.ஆர். வாசு, சகஸ்ரநாமம், தன் பெண்ணையே விலை பேசுபவராக வரும் வி.எஸ். ராகவன் நன்றாக நடித்திருக்கிறார்கள். அதுவும் ஜெமினி மெலோட்ராமா பண்ணக்கூடிய வாய்ப்பு நிறைய இருந்தும், அவர் மிகவும் அருமையாக, நம்பும்படியாக நடித்திருக்கிறார்.

இசை அமைப்பாளர் யார் என்று நினைவில்லை. அனேகமாக வி. குமார் இல்லை எம்எஸ்வி. “ஆணையிட்டேன் நெருங்காதே” பாட்டு ஒன்றுதான். உடனே நினைவு வருகிறது. சாரதா நினைவுபடுத்திய மற்ற இரண்டு பாட்டுக்களும் எனக்கு அவ்வளவாக பிடிக்காது. பாட்டுக்களை எங்காவது கேட்க முடிந்தால் சொல்லுங்கள், ஒரு லிங்க் செய்துவிடுகிறேன்.

ஆகஸ்ட் 30, 2008 அன்று சேர்த்தது:

சாரதாவுக்கு நன்றி! அவரது மறுமொழியிலிருந்து – மற்ற பாடல்கள், ‘நாளை நாம் ஒரு ராஜாங்கம் அமைப்போம், ஆண்டு பாருங்கள் தோழர்களே’ (இறந்து போன வி.கோபாலகிருஷணன் தவிர மற்ற நால்வரும் மீண்டும் சந்திக்கும்போதெல்லாம் இப்பாடல் பின்னணியில் ஒலிப்பது சிறப்பு). இது போக, ஓடும் ரயிலில் நாகேஷ் பிச்சையெடுக்கும் பாடல் ‘நானும் கூட ராஜாதானே நாட்டு மக்களிலே’.

நல்ல படம் மக்களுக்கு பிடிக்காது என்ற தத்துவப்படி ரிலீஸானபோது இப்படம் சரியாகப்போகவில்லை. ஆனால் இப்போது படம் பார்ப்பவர்கள் கேட்கும் கேள்வி ‘இந்த நல்ல படம் ஏன் ஓடவில்லை?’.

குறைகள் இருந்தாலும் பார்க்கக்கூடிய படம்.