It Happened One Night
ஏப்ரல் 24, 2024 பின்னூட்டமொன்றை இடுக
எனக்கு மிகவும் பிடித்த திரைப்படங்களில் ஒன்று.
1934-இல் வந்த திரைப்படம். க்ளார்க் கேபிள், க்ளாடெட் கோல்பர்ட் நடித்தது. ஃப்ராங்க் காப்ரா இயக்கம். 1933-இல் சாமுவெல் ஹாப்கின்ஸ் ஆடம்ஸ் எழுதிய Night Bus என்ற சிறுகதையை அடிப்படையாகக் கொண்டது.
இந்தத் திரைப்படத்தில் நடித்தற்காக க்ளார்க் கேபிள் சிறந்த நடிகருக்கான ஆஸ்கார் விருதைப் பெற்றார். க்ளாடெட் கோல்பர்ட்டுக்கு சிறந்த நடிகைக்கான விருது. ஃப்ராங்க் காப்ராவுக்கு சிறந்த இயக்குனர் விருது. ராபர்ட் ரிஸ்கினுக்கு சிறந்த திரைக்கதைக்கான விருது. முத்தாய்ப்பாக சிறந்த திரைப்படத்துக்கான விருதும்…
எல்லி ஆண்ட்ரூஸ் பெரிய பணக்கார வீட்டுப் பெண். கிங் வெஸ்ட்லி என்ற விமான ஓட்டியுடன் காதல். அவன் பணத்துக்காகத்தான் இவளை விரும்புகிறான் என்று அப்பா ஆண்ட்ரூஸுக்கு நன்றாகத் தெரியும். அதனால் காதலுக்கு தடை போடுகிறார். எல்லி வீட்டுக் காவலிலிருந்து தப்பித்து ஓடிவிடுகிறாள், மையாமியிலிருந்து கிங் வசிக்கும் நியூ யார்க் செல்ல வேண்டும். கிங்கோடு அவள் ஒன்று சேரக்கூடாது என்பதற்காக அப்பா அவளைக் கண்டுபிடித்து வீட்டுக்குக் கூட்டி வர தனிப்படையையே இறக்குகிறார், கண்டுபிடித்துத் தருபவர்களுக்கு பெரிய பரிசுகளை அறிவிக்கிறார்.
எல்லி மையாமியிலிருந்து நியூ யார்க் செல்லும் ஒரு பஸ்ஸில் ஏறுகிறாள். அவள் சக பயணி பத்திரிகை நிருபர் பீட்டர் வார்ன். பீட்டருக்கு அவள் யாரென்று தெரிந்துவிடுகிறது. இருந்தாலும் கொஞ்சம் இரக்கம், அவள் தப்பிச் செல்வதைப் பற்றி பத்திரிகையில் எழுதினால் பெரிய சென்சேஷன் ஆகும் என்ற எண்ணம். அதனால் அவளுக்கு உதவுவார். அதே நேரத்தில் எல்லி அதீத செல்லம் கொடுத்து வளர்க்கப்பட்ட பெண் என்று அவருக்கு கொஞ்சம் இளக்காரமும் உண்டு. போகப் போக இருவருக்கும் காதல்….
கேபிள் கலக்கி இருப்பார். க்ளாடெட்டும் சளைக்கவில்லை. ஆனால் என்னைப் பொறுத்தவரையில் திரைக்கதையை எழுதிய ரிஸ்கின்தான் நாயகன். எளிய கதையை மிகச் சுவாரசியமான திரைக்கதையாக மாற்றி இருக்கிறார்.
இதைத் தழுவி ஹிந்தியில் ராஜ் கபூர், நர்கீஸ் நடித்து சோரி சோரி என்ற திரைப்படத்தை ஷங்கர்-ஜெய்கிஷன் இசையில் ஏவிஎம் தயாரித்தனர். பல அருமையான பாடல்கள் கொண்ட திரைப்படம். ஆமிர் கான், பூஜா பட் நடித்து தில் ஹை கி மாந்தா நஹின் என்றும் தொண்ணூறுகளில் ஒரு திரைப்படம் வந்தது.
சமீபத்தில் எழுத்தாளர் பி.ஏ. கிருஷ்ணன் இந்தத் திரைப்படத்தை குறிப்பிட்டிருந்தார். அதனால்தான் மீண்டும் ஒரு முறை பார்த்தேன். படத்தின் charm குறையவே இல்லை. கட்டாயம் பாருங்கள் என்று பரிந்துரைக்கிறேன்.
தொகுக்கப்பட்ட பக்கம்: ஆங்கிலத் திரைப்படங்கள்
அண்மைய பின்னூட்டங்கள்