மீண்டும்

புத்தாண்டு வாழ்த்துக்கள்!

கிட்டத்தட்ட 15 ஆண்டுகளுக்கு முன் (பழைய) திரைப்படங்களைப் பற்றி என் விமர்சனங்களை பதிவு செய்ய இந்த பதிவுத் தளத்தை ஆரம்பித்தேன். மூன்று நான்கு வருஷத்துக்குப் பிறகு செயலிழந்து போயிற்று.

எனக்கு பழைய திரைப்படங்கள் – அதாவது 70கள் வரை வெளி வந்த திரைப்படங்கள் – மீது நிறைய ஈர்ப்பு இருந்த காலம் அது. இன்றும் அந்தக் கால கட்டத்தில் வந்த திரைப்பாடல்களுக்கு என் மனதில் பெரிய இடம் உண்டு – ராஜாவுக்கும் ரஹ்மானுக்கும் பெரிய இடம் உண்டுதான், ஆனால் ஜி. ராமநாதனுக்கும் எம்எஸ்விக்கும் – குறிப்பாக விஸ்வநாதன்-ராமமூர்த்தி இணைக்கும் எஸ்.டி. பர்மனுக்கும் ஷங்கர்-ஜெய்கிஷனுக்கும் ஏறக்குறைய சமமான இடம் உண்டு. கேவிஎம்முக்கும் சுதர்சனத்துக்கும் ஓ.பி. நய்யாருக்கும் சி. ராமசந்திராவுக்கும் ஆர்.டி. பர்மனுக்கும் இவர்களுக்கு மிக அருகில் இடம் உண்டு.

அப்போது இந்தத் தளத்தை ஆரம்பிக்க கிரியா ஊக்கியாக இருந்தது சன் தொலைக்காட்சி பழைய படங்களை வரிசையாகத் திரையிட்டதுதான். பல நானே கேட்டிராத அடாசு திரைப்படங்கள். இருந்தாலும் பார்த்துக் கொண்டிருந்தேன், அதைப் பற்றி எழுதிக் கொண்டிருந்தேன்.

இன்று திரைப்படங்களைப் பார்க்கும் நேரத்தை விட நெட்ஃப்ளிக்சிலும் அமேசான் ப்ரைமிலும் திரைப்படங்களைத் தேடும் நேரம்தான் அதிகம். அதுவும் நாளின் இறுதியில் மூளையைக் கழற்றி வைத்துவிட்டு பார்க்கக் கூடிய மசாலா படங்களையே தேடுகிறேன், குறிப்பாக தெலுகுப் படங்களை. இருந்தாலும் பார்க்கத்தான் செய்கிறேன்.

இந்தப் புத்தாண்டில் பார்க்கும் திரைப்படங்களைப் பற்றி திரும்பவும் எழுத ஆரம்பிக்கலாம் என்று யோசனை. பழைய திரைப்படங்கள் என்று குறுக்கிக் கொள்ளாமல் எழுத எண்ணம். ஆனால் பழைய திரைப்படங்களும் விலக்கில்லை. பார்ப்போம்.

தொகுக்கப்பட்ட பக்கம்: அறிமுகம்